बेलका सांस्कृतिक तथा पर्यटन महोत्सव वैशाख १ देखि ७ गतेसम्म आयोजना हुँदै

रामपुर । उदयपुर जिल्लाको बेलका नगरपालिकामा प्रथम  बेलका सांस्कृतिक तथा पर्यटन महोत्सव वैशाख १ देखि ७ गतेसम्म आयोजना हुने भएको छ ।

वैशाख १ गते बेलकास्थित सुनखानीबाट महोत्सवको शुभारम्भ हुने  बेलका नगरस्तरीय पर्यटन समितिका सचिव तथा बेलका सांस्कृतिक तथा पर्यटन महोत्सवका सदस्य सचिव टंक फुयाँल शर्माले जानकारी दिए । 

महोत्सव उद्घाटनका अवसरमा स्थानीय विभिन्न जातजातिका सांस्कृतिक नृत्य तथा झाँकी प्रदर्शन गरिने छ । 

महोत्सवको उद्घाटपछि वैशाख २ गतेदेखि ५ गतेसम्म पर्यटकहरूलाई बेलकाका पर्यटकीय स्थलको भ्रमण गराइनेछ । 
वैशाख-६ गते जल, जमिन, आकाशका सहासिक खेलहरूको प्रतिस्पर्धात्मक प्रतियोगिता राखिएको छ । 

साइक्लिङ, र्‍याफ्टिङ र बोटिङ प्रतियोगितामा आन्तरिक तथा बाह्य पर्यटकहरू प्रतिस्पर्धीका रुपमा सहभागी हुने छन् । प्रतियोगिताका उत्कृष्ट सहभागीले क्रमशः २५ हजार, २० हजार र १० हजार रुपैयाँ प्राप्त गर्ने छन् । पहिलो पुरस्कार होटल कोशी प्यालेसका सञ्चालक सम्पत राईले प्रदान गर्नेछन् । दोस्रो पुरस्कार फ्लाइअण्डर प्याराग्लाइडिङ कम्पनीका सञ्चालक सुरेश गुरुङ र तेस्रो पुरस्कार बेलका बिच रिसोर्टका सञ्चालक रमण भट्टराईले प्रदान गर्ने छन् । 

यस्तै पर्यटन महोत्सवकै अवसरमा होटल तथा पर्यटन व्यवसायीलाई सम्मान गरिने छ । पर्यटन महोत्सवका अवसरमा आगन्तुकलाई स्थानीय होटल व्यवसयीले २५ देखि ५० प्रतिशतसम्म छुटको व्यवस्था गरेका छन् । 

महोत्सवलाई सफल बनाउन बेलका होटल व्यवसायी संघले ५० हजार रुपैयाँ सहयोग गरेको छ ।