बेलकाको पर्यटन विकासका लागि 'कोशी रिभर पार्क' देखि 'पर्यटन विश्वविद्यालय स्थापना' सम्मका योजना

बेलका (उदयपुर) । उदयपुर विकास समितिले बेलका नगरको पर्यटन विकासका लागि तत्कालीन र दीर्घकालीन योजना अघि सारेको छ । 

बेलका पर्यटन महोत्सवको समापन कार्यक्रममा आइतबार उदयपुर विकास समितिले 'कोशी रिभर पार्क' देखि 'पर्यटन विश्वविद्यालय स्थापना' सम्मका योजना प्रस्तुत गरेको छ ।

विकास समितिका अध्यक्ष तथा त्रियुगा नगरपालिकाका पूर्वप्रमुख वलदेव चौधरीले बेलका क्षेत्र बृहत् पर्यटन विकास परियोजना अघि सार्दै छोटो अवधिका पर्यटन विकासका योजनादेखि दीर्घकालीन योजनासम्म प्रस्तुत गरेका छन् । 

बेलका महोत्सव समापनमा प्रमुख अतिथिको मन्तव्य राख्दै अध्यक्ष चौधरीले बेलकाको प्राकृतिक पर्यटन, सांस्कृतिक पर्यटन, साहासिक पर्यटन, पूर्वाधार निर्माण, प्रचार-प्रसार र ब्राण्डिङ, स्थानीय सहभागिता र दिगोपनजस्ता आधारको विकास गरिने बताए । 

छोटो अवधिका पर्यटन विकासका योजनाका लागि २ वर्षको समयावधि राखिएको छ । यसअन्तर्गत सरसफाइका आधारभूत संरचना, होमस्टे प्रवर्धन, महोत्सव सञ्चालन, साहासिक खेल प्रतियोगिता सञ्चालन गर्ने योजना छन् । यसका लागि १ करोड २५ लाख बजेट निर्धारण गरिएको उनले बताए । 

अध्यक्ष चौधरीले मध्यम अवधिको पर्यटन विकासका लागि ३ देखि ५ वर्षको समायावधि तोकिएको बताए । यसका लागि साहासिक खेलको प्रवर्द्धन र विकास, धार्मिक पर्यटनको प्रवर्द्धन र विकास साथै राष्ट्रिय- अन्तर्राष्ट्रिय स्तरमा प्रचार प्रसार र ब्राण्डिङका कार्यक्रम गर्ने योजना राखिएको छ । यसका लागि २ करोड ५० लाख रुपैयाँ बजेट निर्धारण गरिएको छ । 

विकास समितिले दीर्घकालीन बेलकाको पर्यटनको विकासका लागि १० वर्षको समायावधि तोकिएको छ । यो अवधिमा ठूला रिसोर्ट र इको पार्कको निर्माण गरिने छ । यस्तै बेलकामा अन्तर्राष्ट्रिय पर्यटन केन्द्रको स्थापना गरिने छ भने बेलकामा पर्यटन विश्वविद्यालयको स्थापना गरिने छ । यसका लागि १ अर्ब २५ करोड बजेट निर्धारण गरिएको छ ।

महोत्सव समापन समारोहमा बेलका पर्यटन समितिका संयोजक शिव थापा, बेलका पर्यटन महोत्सवका सदस्य सचिव टङ्क शर्मा फुयाल, होटल तथा पर्यटन व्यवसायी सङ्घका कोशी प्रदेश सदस्य रमण भट्टराईलगायत पर्यटनकर्मीहरू र सर्वसाधारणको उपस्थिति रहेको थियो । 

साइक्लिङ प्रतियोगिताका उत्कृष्ट पुरस्कृत 

बेलका पर्यटन महोत्सवका अवसरमा आइतबार बिहान आयोजित साइक्लिङ प्रतियोगितामा प्रथम निमा शेर्पा, दोस्रो मिलन परियार, तेस्रो उत्सव मग्राती र सान्त्वना सबिन कट्वाल भएका छन् । 

उनीहरूले क्रमशः नगद १२ हजार ५ सय ५ रुपैयाँ, ८ हजार ५ सय ५ रुपैयाँ, ५ हजार ५ सय ५ रुपैयाँ र १ हजार रुपैयाँ प्राप्त गरेका छन् । विजेतालाई महोत्सवको समापन कार्यक्रमका प्रमुख अतिथि उदयपुर विकास समितिका अध्यक्ष वलदेव चौधरी र पुरस्कार प्रायोजक कोशी प्यालेस होटलका सञ्चालक सम्पत राईले पुरस्कृत गरेका छन् । 

बेलका-८ को सोमबारेबाट बोप्ताङ हुँदै आराङ्गा र आराङ्गाबाट सोमबारेसम्मको साइक्लिङ प्रतियोगिता आयोजना गरिएको थियो । 

पर्यटन महोत्सवमा र्‍याफ्टिङ र प्याराग्लाइडिङ 

'बेलकाको जल, जमिन र आकाशमा रमाऔं: ऐतिहासिक, प्राकृतिक, सांस्कृतिक र साहासिक पर्यटन प्रवर्द्धन गरौं' नाराका साथ गत मंगलबार उदयपुरको ऐतिहासिक स्थल बेलका राजा बेलका रानीको दरबारको भग्नावशेष स्थल बेलका तरीस्थित सुनखानीबाट महोत्सवको उद्घाट गरिएको थियो । 

महोत्सवअन्तर्गत आइतबार सप्तकोशी नदीमा र्‍याफ्टिङको आयोजना गरिएको छ । यस्तै महोत्सव समापन समारोहमा प्याराग्लाइडिङबाट पूष्पवृष्टि गरिएको छ । दर्जन बढी प्याराग्लाइडिङका पाइलटहरूले बेलकाको आकाशमा आफ्ना कलाहरू प्रदर्शन गरेका थिए । यस्तै वराहक्षेत्रबाट त्रिशुले घागी हुँदै बेलका बिच रिसोर्टसम्म पर्यटकहरूलाई र्‍याफ्टिङ गराइएको थियो । 

महोत्सवले तय गरेको नाराजस्तै बेलकाको जल, जमिन र आकाशमा एकै पटक साइक्लिङ, प्याराग्लाइडिङ र र्‍याफ्टिङजस्ता साहासिक खेल पर्यटनको प्रदर्शन गरिएको बेलका पर्यटन विकास समितिका अध्यक्ष शिवकुमार थापले बताए । उनले बेलका पर्यटन विकास समितिले पहिचान र प्रवर्धन बरेका ३० वटा पर्यटकीय स्थलको महोत्सवका अवसरमा प्रवर्धन गरिएको बताए । 

बेलकाको पर्यटनमा कोशी नदीमा आधारित साहासिक खेलसँगै जंगल सफारी र चम्पाकोटबाट सूर्योदय, सूर्यास्त र हिमालहरूको अवलोकनका लागि पर्यटकलाई आमन्त्रण गरिएको बेलका पर्यटन विकास समितिका सचिव टङ्क फुयाल शर्माले बताए । उनका अनुसार बेलकाको पर्यटन झल्काउने वृत्तचित्र निर्माण गरी प्रचारप्रसारसमेत गर्ने जानकारी दिए । 

सप्ताहव्यापी पर्यटन महोत्सव बेलका होटल तथा पर्यटन व्यवसायी संघ, उदयपुर विकास समिति र बेलका नगरपालिकाको पर्यटन समितिले संयुक्त आयोजना गरेको हो ।