सुकुम्बासी समस्या समाधानका लागि एमाले धरानले छलफल गर्ने

धरान । सरकारले राजधानीका सुकुम्बासी बस्तीमा डोजर चलाउन थालेपछि सुकुम्बासीको ठूलो जनघनत्व रहेको धरानमा समेत त्रास बढ्दो छ । 

सुकुम्बासी व्यवस्थापनका लागि घर नम्बर वितरण गरेर नमूना काम थालिएको धरानमा बस्तीवासीहरूले स्थानीय सरकारको ध्यानाकर्षण गराइसकेका छन् । 

सोही सन्दर्भमा नेकपा एमाले धरान उपमहानगर कमिटीले सुकुम्बासी समस्या समाधानका विषयमा छलफल गर्ने भएको छ । नेकपा एमाले धरानका कार्यवहाक अध्यक्ष पारस काङमाङ राईले आगामी वैशाख २५ गते शुक्रबार ११ बजे पदाधिकारीसहितको बैठक आह्वान गरेका छन् । 

सुकुम्बासी समस्याका सम्बन्धमा छलफलसँगै सङ्गठित सदस्यता नवीकरणलगायतका विषयमा समेत छलफल हुने कावा अध्यक्ष राईले जानकारी दिए । 

एमाले धरानले सुकुम्बासीको उचित व्यवस्थापनबिना घरबार उठाउन नहुने धारणा राख्दै आएको छ । 

'आवासको संवैधानिक अधिकारका विषय छन्, मानव अधिकारका कुरा छन्, बस्तीमा असहाय, अपाङ्गगता भएका, ज्येष्ठ नागरिक छन् उनीहरूको बिचल्ली गर्नु हुँदैन,' बिटिभीनेपालसँग कुराकानी गर्दै कावा अध्यक्ष राईले भने, 'राज्यले सुकुम्बासीहरूको उचित व्यवस्थापन नगरी उनीहरूलाई चलाउन हुँदैन ।'