धरानमा ‘लालीबजार’ टिमलाई दर्शकको उत्कृष्ट प्रतिक्रिया

धरान । वैशाख १८ गतेदेखि नेपालभर प्रदर्शनमा आएको नेपाली चलचित्र लालीबजारले यतिबेला पूर्वी नेपालका विभिन्न हलहरूमा उत्साहजनक प्रतिक्रिया पाइरहेको छ । 

विशेषगरी धरानस्थित फ्रेण्ड्स् सिनेमा हलमा दर्शकहरूको बाक्लो उपस्थिति थियो । फिल्मप्रति दर्शकको सकारात्मक प्रतिक्रिया निरन्तर आइरहेको छ । 

चलचित्र हेर्न आउने दर्शकहरूको संख्या बढ्दै जाँदा कलाकार तथा निर्माण टिमसमेत उत्साहित देखिएको छ। फिल्मकी मुख्य अभिनेत्री स्वस्तिमा खड्का फ्रेण्ड्स सिनेमामा पुगेर दर्शकहरूसँग प्रत्यक्ष भेटघाट गर्दै प्रतिक्रिया लिएकी थिइन् । 

दर्शकहरूले फिल्म सामाजिक सञ्जालमा देखिएजस्तो विवादित नभएको र पारिवारिक तथा सन्देशमूलक रहेको बताएका छन् ।
चलचित्र हेर्न आएकी दर्शक सुमी देवानले सामाजिक सञ्जालमा बनेका विभिन्न कन्टेन्ट र विवादभन्दा फिल्मको वास्तविक कथा निकै फरक रहेको प्रतिक्रिया दिएकी छिन् । उनका अनुसार फिल्मले समाजका वास्तविक समस्या र ग्रामीण जीवनको पीडालाई प्रभावकारी रूपमा प्रस्तुत गरेको छ ।

निर्देशक यम थापाको निर्देशनमा बनेको ‘लालीबजार’ ले ग्रामीण परिवेश, गरिबी, शिक्षा, स्वास्थ्य तथा आर्थिक असमानताजस्ता विषयलाई मुख्य कथावस्तु बनाएको निर्माण पक्षले जनाएको छ । फिल्ममा गरिब तथा पिछडिएका समुदायमाथि हुने शोषण, वादी परिवारका समस्या, शिक्षा प्राप्तिमा हुने विभेद तथा गाउँघरमा व्याप्त सामाजिक सोचलाई मार्मिक ढंगले चित्रण गरिएको छ ।

फिल्मको छायांकन सुमन प्रजापतिले गरेका हुन् भने सम्पादन मित्रदेव गुरुङले गरेका छन् । चलचित्रका कार्यकारी निर्माता प्रदीप भट्टराई रहेका छन् ।

दर्शकहरूका अनुसार ‘लालीबजार’ केवल मनोरञ्जनमा सीमित नभई समाजको यथार्थ बोल्ने सशक्त चलचित्र बनेको छ । ग्रामीण क्षेत्रका जनजीवन, पछाडि परेको समाज, शिक्षा र स्वास्थ्यका चुनौती तथा आर्थिक अवस्थाको वास्तविक चित्रणले दर्शकलाई भावुक बनाएको प्रतिक्रिया प्राप्त भइरहेको छ ।