विद्यालय जाने उमेरका बालबालिकाका अभिभावकले हेर्नै पर्ने चलचित्र 'रोल नं.१' 

धरान । 'बत्तीको उज्यालो पो अरुले छेकेर छेकिन्छ, ज्ञानको उज्यालो कसैले छेकेर छेकिँदैन छोरो..' 

तीन दशकअघिको नेपाली समाजमा शिक्षाको महत्त्व, कक्षामा प्रथम आउनै पर्ने सामाजिक मनोवृत्ति, तत्कालीन शैक्षिक अवस्था  र प्राथमिक तहमा अध्ययनरत बालबालिकाको बालमनोविज्ञानलाई आधार बनाएर पर्दामा उतारिएको नेपाली कथानक चलचित्र 'रोल नं.१' धरानस्थित फ्रेण्ड्स सिनेमामा प्रदर्शन भइरहेको छ । 

बाल मनोविज्ञानमा आधारित चलचित्र 'रोल नं.१' को प्रतिक्रिया बुझ्दै चलचित्रका कलाकारहरु देशका विभिन्न हलहरुमा पुग्ने क्रम जारी छ । शनिबार चलचित्रका कलाकारले दर्शकसँगै बसेर चलचित्र हेरे ।  कक्षामा प्रथम आउन अर्थात् रोल नं. १ हुनलाई एउटा निरक्षर अभिभावकले आफ्नो सन्तानप्रति गरेको प्रयास र प्रयत्नको उज्यालो र अँध्यारो दुवै पक्षलाई चलचित्रले उद्घाटन गर्न पुगेको छ । चलचित्र हेरेपछि दर्शकले सकारात्मक प्रतिक्रिया दिएका छन् ।     

मुख्यत: चलचित्रले तीन दशकअघिको नेपाली ग्रामीण परिवेशमा शिक्षा प्रणाली, सामाजिक भेदभाव र बाल मनोविज्ञानलाई निकै गम्भीर र भावुक तवरले प्रस्तुत गरेको दर्शकहरुले प्रतिक्रिया दिएका छन् ।  गरीबी र 'प्रथम स्थान' को सामाजिक महत्वबीचको द्वन्द्व देखाउनु चलचित्रको मुख्य मर्म रहेको छ । 'रोल नं. १' आउनुलाई मात्र सफलता मान्ने तत्कालीन समाज र त्यसको प्रभावमा पिल्सिएको एउटा सानो बालकको कथा चलचित्रको केन्द्रबिन्दुमा देखिन्छ ।  विशुद्ध सामाजिक ड्रामा यो चलचित्रले विद्यालयको वातावरणमा हुने विभेदलाई समेत चित्रण गर्न पुगेको छ ।

जब घरमा बत्तीको उज्यालो हुँदैन, छिमेकको बत्तीको उज्यालोबाट एउटा बालक बञ्चित बन्न पुग्छ त्यतिबेला उनका बुवाले भनेका छन् 'बत्तीको उज्यालो पो अरुले छेकेर छेकिन्छ, ज्ञानको उज्यालो कसैले छेकेर छेकिँदैन छोरो..' चलचित्रका संवादहरुले दर्शकमा भावनात्मक प्रभाव पार्न खोजेको देखिन्छ । चलचित्रका संवादले तत्कालीन नेपाली समाजमा शिक्षा र गरिबीलाई हेर्ने दृष्टिकोण कति कठोर रहेछ भन्ने देखाएको छ ।  संगीतको संवेदनशीलता र दृश्यहरुले पीडा महसुस गराउन पुगेका छन् ।

मुख्य भूमिकामा रहेका बालकलाकार नीर्भीक रेग्मीको भावुक अभिनय सबैभन्दा बलियो पक्ष देखिन्छ । बाजेको पात्र सुवासप्रसाद गजुरेलले पनि समाजको 'कटु यथार्थ' लाई निकै राम्रोसँग व्यक्त गरेका छन् । चलचित्रको दृश्यभाषामा देखाइएको गाउँले परिवेश, विद्यालयको दृश्य र पात्रहरूको पहिरनले चलचित्रको कथा 'रियल' र 'ग्राउन्डेड' रहेको देखिन्छ । बुवाको पात्रमा देखिएका मुकुन भुसालले दर्शकलाई निराश बनाएका छैनन् ।  

सामाजिक कथामा कहिलेकाहीँ दर्शकलाई 'धेरै नै भावुक' बनाउने क्रममा कथाको गति (पेसिङ) सुस्त हुन पुग्छ । चलचित्रले 'रोल नं. १' को मुद्दालाई समाधान गर्न गरेको प्रयास असामान्य लाग्छ । तर यसको सन्देशले भने बलियो अर्थ बोकेको देखिन्छ ।  चलचित्र  'रोल नं. १' एउटा 'सचेतनामूलक र सन्देशमूलक' चलचित्र बनेको छ ।  यो चलचित्रले विद्यालय जाने उमेरका बालबालिकाका अभिभावकहरू र शिक्षा प्रणालीमा चासो राख्नेहरूका लागि एउटा महत्त्वपूर्ण प्रश्न खडा गरेको छ । 

तीन दशकअघिको कथा भए पनि वर्तमान नेपाली समाजमा छोराछोरीको शैक्षिक प्रगतिलाई लिएर मानसिक रुपमा जडता पालिरहेका अभिभावकलाई भने चलचित्रले सकारात्मक प्रभाव छोड्न सक्छ । विद्यालय जाने उमेरका बालबालिकाका अभिभावकहरूले यो चलचित्र एकपटक हेर्नै पर्छ । 

चलचित्रमा कलाकार भुसालसँगै सुशांक मैनाली, रेनु नाथ योगी, एभोनराज उप्रेती, सुवासप्रसाद गजुरेल, बालकलाकारहरु नीर्भीक रेग्मी, संयम कटुवाल, रिन्छेन लामालगायतको अभिनय छ । चलचित्र महेश दवाडीको लेखनमा जोन योञ्जनले निर्देशन गरेका हुन् ।