निनाचन्द्र राईसहित १०२ जनाले परित्याग गरे श्रम संस्कृति पार्टी

धरान । श्रम संस्कृति पार्टीमा आबद्ध निनाचन्द्र राईसहित १०२ जनाले सामूहिक रूपमा पार्टी परित्याग गरेको घोषणा गरेका छन् । बुधबार जारी गरिएको प्रेस विज्ञप्तिमार्फत उनीहरूले पार्टी अध्यक्ष हर्कराज राई (साम्पाङ) ले दिएको प्रतिबद्धता विपरीत निर्णय गरेको आरोप लगाउँदै पार्टी छाड्ने निर्णय सार्वजनिक गरेका हुन् ।

विज्ञप्तिमा पार्टीमा प्रवेश गर्नुअघि आफूहरू सामाजिक अभियान र सामाजिक कार्यमार्फत समुदायमा सक्रिय रहेको उल्लेख गरिएको छ। आगामी स्थानीय निर्वाचनमा धरान उपमहानगरपालिकाको नगर प्रमुख तथा विभिन्न वडामा प्रतिनिधित्व गर्ने गरी उम्मेदवारी दिने योजनासहित पार्टीमा प्रवेश गरेको उनीहरूको दाबी छ ।

परित्याग गर्ने समूहका अनुसार पार्टी अध्यक्ष हर्कराज राईले पटक–पटक सम्पर्क गरी आगामी निर्वाचनमा धरानको नगर प्रमुखका रूपमा उम्मेदवारी दिने वातावरण बनाइदिने आश्वासन दिएका थिए। सोही विश्वासका आधारमा छलफल र सहमति पश्चात् आफूहरू पार्टीमा आबद्ध भएको विज्ञप्तिमा उल्लेख छ ।

तर केही दिनअघि पार्टी अध्यक्षले सामाजिक सञ्जाल फेसबुकमार्फत धनबहादुर राईलाई नगर प्रमुख पदका उम्मेदवारका रूपमा घोषणा गरेपछि आफूहरू असन्तुष्ट बनेको समूहले जनाएको छ। अध्यक्षले गरेको प्रतिबद्धता पूरा नगरी उल्टो निर्णय गरेको, पूर्वसहमतिलाई बेवास्ता गरेको तथा आफूहरूलाई धोका दिएको निष्कर्षमा पुग्दै पार्टीमा बसिरहन नसक्ने अवस्था सिर्जना भएको विज्ञप्तिमा उल्लेख गरिएको छ।

समूहले पार्टीको साधारण सदस्यता समेत नरहने गरी सामूहिक रूपमा पार्टी परित्याग गरेको जनाएको छ। विज्ञप्तिमा केन्द्रीय सदस्य पूर्ण गहतराज विश्वकर्मा, प्रदेश सदस्य विष्णुकुमारी राई (राखी नेवाङ), सदस्यहरू निनाचन्द्र राई, नरहरि राई तथा अटल सिंह राईलगायतका हस्ताक्षर रहेका छन् ।

विज्ञप्तिअनुसार पार्टी परित्याग गर्नेहरूको संख्या १०२ रहेको जनाइएको छ। उनीहरूले पार्टी नेतृत्वको निर्णयप्रति गम्भीर असहमति रहेको भन्दै आजकै मितिदेखि लागू हुने गरी सामूहिक रूपमा अलग भएको घोषणा गरेका छन् ।