मन्त्रीकेन्द्रित बजेट ल्याएको भन्दै कोशी प्रदेशमा सत्तारूढ दलकै सांसदद्वारा हस्ताक्षर अभियान

धरान ।  कोशी प्रदेश सरकारले आगामी आर्थिक वर्षका लागि प्रस्तुत गरेको बजेट असन्तुलित र मन्त्रीकेन्द्रित भएको भन्दै सत्तारूढ दलका सांसदहरू नै आक्रोशित बनेका छन्। बजेट सच्याउनुपर्ने माग राख्दै नेकपा (एमाले) र नेपाली कांग्रेसका प्रदेशसभा सदस्यहरूले औपचारिक रूपमै हस्ताक्षर अभियान सुरु गरेका छन्।

प्रदेश सरकारले ल्याएको बजेटमा योजना छनोट गर्दा पहुँच र मन्त्रीहरूको स्वार्थलाई मात्रै प्राथमिकता दिएको भन्दै सांसदहरूले असन्तुष्टि जनाएका हुन्। आफ्ना निर्वाचन क्षेत्रका जनताप्रति जवाफदेही हुनुपर्ने अवस्थामा बजेटले पक्षपातपूर्ण व्यवहार गरेको भन्दै उनीहरूले संशोधनको मागलाई जोडतोडले उठाएका छन्।

मुख्यमन्त्री हिक्मतकुमार कार्कीले बजेट पारित गर्नका लागि आग्रह गर्दै आएका छन्। यद्यपि, असन्तुष्ट सांसदहरूले ‘उधारो सहमति’ नमान्ने अडान लिएका छन्। उनीहरूले ठोस र व्यावहारिक संशोधन नभएसम्म बजेट पारित गर्ने प्रक्रियामा असहयोग गर्ने स्पष्ट पारेका छन्।

नेपाली कांग्रेसका सांसद हिमाल कार्कीले सरकारले ल्याएको असन्तुलित र मन्त्री केन्द्रित बजेट संशोधन नगरेसम्म स्वीकार गर्न नसकिने प्रतिक्रिया दिएका छन् । 

बजेटमा सहमति जुटाउन भइरहेका प्रयासहरू विफल भएपछि प्रदेशसभा बैठक आगामी १६ असारसम्मका लागि स्थगित गरिएको छ। तर, सरकारले आफ्ना माग सम्बोधन नगरे १६ गते बस्ने बैठकमा सत्तारूढ दलकै सांसदहरूले सदनमै विरोध गर्ने चेतावनी दिएका छन्।

सत्तापक्षका सांसदहरू नै बजेटको विरोधमा उत्रिएपछि कोशी प्रदेश सरकार अहिले आन्तरिक दबाबमा परेको छ। बजेटलाई सर्वसम्मत पारित गराउनुपर्ने मुख्यमन्त्री कार्कीका लागि आफ्नै सांसदहरूलाई मनाउनु अहिलेको मुख्य चुनौती बनेको छ।

बजेटको विपक्षमा कांग्रेसबाट हिमाल कार्की, भूपेन्द्र राई, विनोद बान्तवाले हस्ताक्षर अभियानको नेतृत्व गरेका छन् भने एमालेबाट होमबहादुर थापा, एकराज कार्कीसहित छन् । 

कोशी प्रदेश सरकारले आगामी आर्थिक वर्षका लागि ल्याएको ४० अर्ब ४४ करोड ९८ लाख रुपैयाँको बजेट ल्याएको थियो ।