वराहक्षेत्रमा श्रम संस्कृतिको सिफारिस : वडाध्यक्षमा ४० मत पाएर पराजित भुइँ कविसहित तीन जना

वराहक्षेत्र । हर्क साम्पाङ नेतृत्वको श्रमसंस्कृति पार्टीले वराहक्षेत्र नगर पालिकामा नगर प्रमुखको उम्मेदवारका रुपमा तीन जनाको नाम सिफारिस गर्ने निर्णय गरेको छ । 

लामो समयको छलफलपछि पार्टीको वराहक्षेत्र नगर कमिटीले आगामी २०८४ को स्थानीय तहको निर्वाचनमा उम्मेदवारका रुपमा वराहक्षेत्र-५ का सूर्यबहादुर बस्नेत, वराहक्षेत्र-२ का विष्णु राना र वराहक्षेत्र-३ का जीवन राईलाई सिफारिस गर्ने निर्णय गरेको हो ।

भुइँ कविका रुपमा आफूलाई चिनाउने बस्नेत २०७९ को स्थानीय तहको निर्वाचनमा वराहक्षेत्र-५ बाट स्वतन्त्र उम्मेदवारी दिएर पराजित भएका थिए । उनले वडामा ४० मत प्राप्त गरेका थिए ।  यस्तै विष्णु राना गत प्रतिनिधि सभा निर्वाचनमा सुनसरी-४ बाट उम्मेदवारी दिएका थिए । उनीसमेत निर्वाचनमा पराजित भएका थिए । उनले २७४३ मत प्राप्त गरेका थिए । 

यसैगरी जीवन राई अशोक राई नेतृत्वको जनता समाजवादी पार्टी परित्याग गरी श्रमसंस्कृति पार्टीमा प्रवेश गरेका थिए । बस्नेत श्रमसंस्कृति पार्टीका केन्द्रीय सदस्य हुन् भने राना र राई प्रदेश कमिटी सदस्य हुन् । 

पार्टीका वराहक्षेत्र अध्यक्ष नरेश चाम्लिङका अनुसार बैठकले सिफारिस गर्ने निर्णय गरिसकेको छ । उनले भने, 'भोलितिर निर्णय बुझाइने छ । 

एकै जनाको नाममा सहमति गर्ने प्रयास भए पनि हुन नसकेको उनले बताए । '८ जनाबाट झारेर तीन जनाको नाम सिफारिस गर्ने निर्णय गरेका छौँ । अध्यक्ष राईले भने ।  उनले उम्मेदवारका रुपमा आफ्नो दाबी भने नरहेको बताए । उनले सङ्गठन बनाउन आफू लागिपरेको बताए ।

पार्टीका केन्द्रीय अध्यक्ष साम्पाङको निर्वाचन क्षेत्र सुनसरी-१ मा वराहक्षेत्रका १ देखि ५ नम्बर वडा  र ७ नम्बरदेखि ११ नम्बर वडा सुनसरी क्षेत्र नं. ४ मा पर्छ । 

यसअघि अध्यक्ष साम्पाङले उम्मेदवारको नाम सिफारिस गर्न एक महिनाअघि फेसबुकमा स्टाटस लेखेका थिए । पछि नगर कमिटीलाई आधिकारिक पत्राचारसमेत गरेका थिए । 

साम्पाङले स्थानीय तहको निर्वाचन लक्षित सक्षम उम्मेदवार खोजी गरिरहेका छन् । यसअघि उनले धरान उपमहानगरपालिकाको नगर प्रमुखको उम्मेदवार बनाउने भन्दै निनाचन्द्र राईलाई पार्टी प्रवेश गराएका थिए । तर उनको उम्मेदवारी विरुद्ध पार्टीमै विवाद भएपछि नेकपा एमालेबाट धरान-४ निर्वाचित वडाध्यक्ष धनबहादुर राईलाई टिकट दिने निर्णय गरेका थिए । धनबहादुर वडाध्यक्षबाट राजीनामा दिएर श्रमसंस्कृति पार्टीमा आवद्ध भएका थिए । निनाचन्द्रले भने सयौंको सङ्ख्यामा कार्यकर्तासहित श्रमसंस्कृति पार्टी परित्याग गरेका थिए । 

विवादित छविका भुइँ कवि

सुनसरी-१ बाट प्रतिनिधि सभा सदस्य निर्वाचित अध्यक्ष हर्क साम्पाङको प्रशंसा गरेर चर्चामा आएका आफूलाई भुइँ कवि बताउने बस्नेतले यसअघि वराहक्षेत्रमा विवादित गतिविधि गर्दै आएका थिए । 

त्यसो त पार्टीभित्रै पनि उनी बेलाबेला विवादमा पर्दै आएका छन् । उनले जेनजी चौतारी निर्माण अभियान श्रम संस्कृतिका नाममा सुरु गरेर निर्माण सम्पन्न गर्दा वराहक्षेत्र सचेत समूहका नाममा गरेको भन्दै पार्टीभित्रै विवादमा आएका थिए । 

एक वर्षअघि वराहक्षेत्र-५ स्थित नेवा खल: को मन्दिर स्थल जाने बाटो देखाउने सूचना बोर्ड भुइँ कविले आफ्नो नेतृत्वमा भत्काउन लगाएका थिए । असन्तुष्ट स्थानीय नेवार समुदायले उनीविरुद्ध स्थानीय तहमा उजुरी गरेका थिए । माफी मागेपछि उक्त विवादबाट उनले उन्मूक्ति पाएका थिए । 

उनी कहिले हर्क सम्पाङलाई फुर्काउने कविता लेखेर चर्चामा आउँछन् भने आलोचनाका कारण विवादित बन्छन् । एक वर्ष अघिदेखि नै आफू श्रम संस्कृति पार्टीबाट वराहक्षेत्रको नगरप्रमुख बन्ने चर्चा गराएका उनी वराहक्षेत्रको पार्टी बैठकमा समेत झुलुक्क झुल्किएर हिंडिहाल्ने, मोबाइल तेर्स्याएर कन्टेन्ट बनाइहाल्ने लगायतका गतिविधिले आलोचित छन् । 

वराहक्षेत्र-५ मा २०७९ को निर्वाचनमा स्वतन्त्र उम्मेदवारी दिएका उनले मात्रै ४० भोट पाए । तत्पश्चात पनि उनी सामाजिक अभियन्ताको छवि बनाउन लागि परेका छन् । वराहक्षेत्रको हैंटा खोला सरसफाइ अभियान, जेष्ठ नागरिक चौतारी, जेनजी चौतारी निर्माणमा पनि उनले सकृयता देखाएका छन्  ।