कोशी प्रदेशमा मुख्यमन्त्रीको निरन्तरता पार्टी अध्यक्षको निर्णयमा निर्भर रहन्छ : शेरधन राई

विराटनगर । नेकपा एमालेका कोशी प्रदेश इन्चार्ज शेरधन राईले पार्टी अध्यक्ष केपी शर्मा ओलीले निर्देशन दिए मुख्यमन्त्री हिक्मतकुमार कार्कीले तत्काल पद छाड्ने बताएका छन् । उनले मुख्यमन्त्रीको निरन्तरता वा परिवर्तन पार्टी अध्यक्षको निर्णयमा निर्भर रहेको स्पष्ट पारेका छन्।

विराटनगरमा आइतबार सञ्चारकर्मीसँग कुरा गर्दै राईले अध्यक्ष ओलीले पद छाड्न निर्देशन दिएको क्षण मुख्यमन्त्री कार्कीले त्यसको पालना गर्ने दाबी गरे।

“अध्यक्षले तपाईं छाड्नुस्, अर्को साथीलाई पालो दिनुस् भन्नुभयो भने तत्क्षण, तत्सेकेन्डमै उहाँले छोड्नुहुन्छ,” राईले भने, “पार्टी अध्यक्षको निर्देशन अक्षरशः पालना गर्ने प्रतिबद्धता मुख्यमन्त्रीज्यूले जनाइसक्नुभएको छ। यसमा कुनै शंका छैन।”

राईका अनुसार तत्काल भने कार्कीकै नेतृत्वमा कोशी प्रदेश सरकार अघि बढ्नेछ। केन्द्रमा एमाले र नेकपाबीच भएको सहमतिअनुसार नयाँ सत्ता समीकरण कार्यान्वयनको प्रक्रिया सुरु भइसकेको उनले बताए। उनका अनुसार केही दिनभित्रै प्रदेश सरकारको स्वरूप परिवर्तन हुनेछ।

सत्ता साझेदारीको खाका अन्तिम चरणमा पुगेको जानकारी दिँदै राईले सोमबार औपचारिक छलफलमार्फत मन्त्रालय बाँडफाँट र साझा कार्यक्रम टुंग्याउने तयारी भइरहेको बताए।

प्रदेशसभामा एमालेका ४० र नेकपाका १७ सांसद रहेको उल्लेख गर्दै उनले मन्त्रालयको संख्या नबढाई ६–४ वा ६–३ को अनुपातमा मन्त्रालय बाँडफाँट हुनसक्ने संकेत गरे। नयाँ सत्ता समीकरण बनेसँगै हाल सरकारमा सहभागी नेपाली कांग्रेस बाहिरिने र नेकपा सरकारमा सहभागी हुने प्रक्रिया अघि बढ्ने उनको भनाइ छ।

यसबीच मुख्यमन्त्री कार्की र प्रदेश इन्चार्ज राईबीच शक्ति संघर्ष चलिरहेको भन्ने चर्चालाई राईले अस्वीकार गरे। आफूले पार्टी अध्यक्षको निर्देशन कार्यान्वयनका लागि समन्वय र सहजीकरण मात्र गरेको उनको दाबी छ।

“यो कुनै व्यक्तिगत टकराव होइन। दुई दलबीचको सहमति कार्यान्वयन गर्ने सन्दर्भमा देखिएको प्राविधिक विषय मात्र हो, जुन अहिले सुल्झिसकेको छ,” उनले भने।

सरकारको निर्णय पुनरावलोकनको विषयमा तत्काल परिवर्तन सम्भव नभएको राईले बताए। दुईतिहाइ बहुमतबाट पारित भइसकेको विषय भएकाले अन्य दलसँगको सहमतिबिना त्यसलाई पुनरावलोकनको एजेन्डा बनाउन नसकिने उनको तर्क छ।

त्यस्तै, मुख्यमन्त्री कार्कीले आन्तरिक मामिला मन्त्रीलाई प्रदेश सरकारको प्रवक्ताबाट हटाएको विषयलाई पनि राईले प्रतिशोधका रूपमा नलिन आग्रह गरे। मन्त्री बैठकमा ढिला उपस्थित भएकाले अर्को मन्त्रीलाई निर्णय सार्वजनिक गर्ने जिम्मेवारी दिइएको मुख्यमन्त्रीको स्पष्टीकरण रहेको उनले बताए।

एमालेभित्र निर्वाचन समीक्षा तथा पार्टी पुनर्गठनका लागि गठित कार्यदलले प्रतिवेदनको मस्यौदा तयार गरिसकेको र चाँडै केन्द्रीय कमिटीमा पेस गर्ने तयारी भइरहेको राईले जानकारी दिए। कोशी प्रदेश सरकारलाई लिएर एमालेभित्र देखिएको विवाद भने अहिले साम्य भइसकेको उनको दाबी छ।