कोशी सरकारबाट कांग्रेसका चार मन्त्री र एक राज्यमन्त्रीले राजीनामा दिने

विराटनगर । कोशी प्रदेश सरकारमा सहभागी नेपाली कांग्रेसका चार मन्त्री र एक राज्यमन्त्रीले बुधबार राजीनामा दिने भएका छन्। केन्द्रमा नेकपा एमाले र नेपाली कम्युनिष्ट पार्टीबीच सत्ता सहकार्यका लागि सहमति बनेपछि कांग्रेस प्रदेश सरकारबाट बाहिरिन लागेको हो।

कांग्रेस संसदीय दलका प्रमुख सचेतक गोपाल तामाङका अनुसार दलका नेता उद्धव थापाले सरकारमा सहभागी मन्त्रीहरूलाई बुधबार नै राजीनामा दिन निर्देशन दिएका छन्।

‘दलका नेताले आजै राजीनामा दिन निर्देशन दिनुभएको छ,’ तामाङले भने, ‘मन्त्रीहरूले पनि सोहीअनुसार राजीनामा दिने जानकारी आएको छ।’

कांग्रेसका मन्त्रीहरूलाई बिदाइ गर्ने उद्देश्यले मुख्यमन्त्री हिक्मतकुमार कार्कीले बुधबार दिउँसो मन्त्रिपरिषद् बैठक बोलाएका छन्। मुख्यमन्त्री तथा मन्त्रिपरिषद्को कार्यालय, विराटनगरमा दिउँसो साढे ३ बजे बैठक बस्ने तय भएको छ।

मुख्यमन्त्री कार्कीका प्रेस सल्लाहकार विक्रम लुइँटेलका अनुसार कांग्रेसका मन्त्रीहरूले बुधबार साँझ वा बिहीबार बिहानसम्म राजीनामा दिने तयारी गरेका छन्।

राजीनामा दिनेमा भौतिक पूर्वाधार विकासमन्त्री प्रदीपकुमार सुनुवार, पर्यटन, वन तथा वातावरणमन्त्री भीम पराजुली, उद्योग, कृषि तथा सहकारीमन्त्री इस्राइल मन्सुरी र स्वास्थ्य मन्त्री मानबहादुर लिम्बू छन्। यस्तै, भौतिक पूर्वाधार विकास मन्त्रालयकी राज्यमन्त्री शोभा चेम्जोङले पनि राजीनामा दिने भएकी छन्।

केन्द्रमा एमाले र नेपाली कम्युनिष्ट पार्टीबीच साउनको दोस्रो साता तीनबुँदे सहमति भएपछि त्यसको प्रभाव प्रदेश सरकारमा परेको हो। दुई दलबीचको सहमतिपछि कोशी प्रदेशमा कांग्रेससहितको मन्त्रिपरिषद् पुनर्गठन गरिएको थियो। सोही क्रममा २०८२ पुस २२ गते कांग्रेसका यी मन्त्रीहरू सरकारमा सहभागी भएका थिए।

कांग्रेस सरकारबाट बाहिरिएसँगै कोशी प्रदेशमा नयाँ सत्ता समीकरणअनुसार मन्त्रिपरिषद् पुनर्गठनको तयारी अघि बढ्ने भएको छ। एमाले र नेपाली कम्युनिष्ट पार्टीबीच भएको सहमतिअनुसार प्रदेश सरकारमा नयाँ सत्ता साझेदारीको प्रक्रिया अघि बढ्नेछ।