कांग्रेसका ४ मन्त्री र १ राज्यमन्त्रीले दिए राजीनामा

विराटनगर । कोशी प्रदेश सरकारमा सहभागी नेपाली कांग्रेसका चार मन्त्री र एक राज्यमन्त्रीले बुधबार राजीनामा दिएका छन्।

राजीनामा दिनेमा भौतिक पूर्वाधार विकासमन्त्री प्रदीपकुमार सुनुवार, पर्यटन, वन तथा वातावरणमन्त्री भीम पराजुली, उद्योग, कृषि तथा सहकारीमन्त्री इस्राइल मन्सुरी, स्वास्थ्यमन्त्री मानबहादुर लिम्बू र भौतिक पूर्वाधार विकास राज्यमन्त्री शोभा चेम्जोङ छन्।

उनीहरूले बुधबार बसेको मन्त्रिपरिषद् बैठकको समापनपछि मुख्यमन्त्री हिक्मतकुमार कार्कीसमक्ष राजीनामा बुझाएका हुन्।
केन्द्रमा नेकपा एमाले र नेपाली कम्युनिष्ट पार्टीबीच साउनको दोस्रो साता तीनबुँदे सहमति भएपछि कांग्रेस कोशी प्रदेश सरकारबाट बाहिरिएको हो। 

एमाले र कांग्रेसबीच भएको सहमतिपछि दोस्रोपटक मन्त्रिपरिषद् पुनर्गठन हुँदा उनीहरू २०८२ पुस २२ गते मन्त्री नियुक्त भएका थिए।

केन्द्रमा नयाँ राजनीतिक समीकरण बनेसँगै त्यसको प्रभाव कोशी प्रदेशमा पनि परेको हो। नयाँ सत्ता समीकरणअनुसार प्रदेश सरकार पुनर्गठनको प्रक्रिया अघि बढेपछि कांग्रेसका मन्त्रीहरूले राजीनामा दिएका हुन्।