कोशी प्रदेश सभा बैठक भदौ ३ मा, नयाँ भवनमा सर्दै संसद्

विराटनगर । झन्डै डेढ महिनादेखि स्थगित कोशी प्रदेश सभाको बैठक आगामी भदौ ३ गतेका लागि आह्वान गरिएको छ।

प्रदेश सभा सचिवालयले सूचना जारी गर्दै नवौँ अधिवेशनको २३औँ बैठक भदौ ३ गते बुधबार दिउँसो १ बजे बस्ने जानकारी दिएको हो।

यसअघि गत असार २४ गते अर्को सूचना जारी नभएसम्मका लागि बैठक अनिश्चितकालका लागि स्थगित गरिएको थियो। ४० दिनभन्दा लामो अन्तरालपछि प्रदेश सभाको बैठक पुनः बस्न लागेको हो।

यसपटकको बैठकको मुख्य विशेषता नयाँ प्रदेश सभा भवन हुनेछ। मोरङको कटहरी–१ स्थित प्रदेश सभा सचिवालय परिसरमा नवनिर्मित भवनमा बैठक सञ्चालन गर्ने तयारी पूरा भएको सचिवालयले जनाएको छ। यसअघि साँघुरो हलमा बैठक सञ्चालन हुँदै आएकोमा अब आफ्नै व्यवस्थित र आधुनिक भवनबाट प्रदेश सभाको बैठक सञ्चालन हुनेछ।

बैठकमा सरकारले ‘दलित अधिकारसम्बन्धी विधेयक’ टेबुल गर्ने तयारी गरेको छ। मन्त्रिपरिषद् बैठकले उक्त विधेयकको मस्यौदा यसअघि नै पारित गरिसकेको छ। प्रदेशमा दलित समुदायको हक, अधिकार र सशक्तीकरणका लागि उक्त विधेयकलाई महत्वपूर्ण मानिएको छ।