मन्त्री छान्न कोशीमा नेकपा संसदीय दलको बैठक सुरु, आकांक्षी धेरै भएपछि सकस

विराटनगर । कोशी प्रदेश सरकार विस्तारको अन्तिम तयारी भइरहेका बेला नेपाली कम्युनिष्ट पार्टी (नेकपा) भित्र मन्त्री छनोटका लागि संसदीय दलको बैठक सुरु भएको छ।
सरकारमा सहभागी हुने मन्त्रीहरूको नाम टुंगो लगाउन नेकपा संसदीय दलको बैठक आज दिउँसो प्रदेशसभा सचिवालयमा जारी छ।

नेकपामा १७ जना सांसद छन्। तीमध्ये पूर्वमाओवादी केन्द्रका १३ र पूर्वएकीकृत समाजवादीका ४ सांसद छन्। सत्ता साझेदार मुख्य दल नेकपा एमालेले कोशीमा नेकपालाई चारवटा मन्त्रालय दिन सहमति जनाएपछि मन्त्रीका आकांक्षीहरूबीच दौडधुप बढेको हो।

नेकपा कोशीका इन्चार्ज राजेन्द्र राईले एमाले चारवटा मन्त्रालय दिन तयार भइसकेको बताएका छन्।

‘एमालेसँग चारवटा मन्त्रालय लिने सहमति भइसकेको छ, तर कुन–कुन मन्त्रालय भन्ने अन्तिम टुंगो लाग्न बाँकी छ,’ राईले भने, ‘दलको बैठकबाट नाम र मन्त्रालयको विषय टुंग्याउने प्रयासमा छौं।’

पार्टीभित्र साविकको एकीकृत समाजवादीले एक र माओवादी केन्द्रले तीन मन्त्री पाउने गरी आन्तरिक समझदारी बनेको छ। एकीकृत समाजवादी समूहबाट दुई महिला सांसद खिनु लङवा लिम्बु र विद्या चाम्लिङबीच मुख्य प्रतिस्पर्धा देखिएको छ। इलामकी लिम्बु प्रत्यक्ष निर्वाचित सांसद हुन् भने मोरङकी चाम्लिङ समानुपातिक सांसद हुन्।

पूर्वमुख्यमन्त्री राजेन्द्र राई र पूर्वमन्त्री कमल जवेगुले यसअघि नै अवसर पाइसकेकाले यसपटक आफूले मौका पाउनुपर्ने दाबी चाम्लिङको छ।

यता, पूर्वमाओवादी समूहमा भने झन्डै एक दर्जन सांसद मन्त्रीका आकांक्षी देखिएका छन्। मन्त्रीका लागि पूर्वमन्त्रीहरू जीवन आचार्य, बाबुराम गौतम र दुर्गा चापागाईंबीच पनि रस्साकस्सी छ।

पार्टीभित्र पुरानै अनुहारलाई दोहोर्‍याउनुको सट्टा नयाँलाई अवसर दिनुपर्ने दबाब नेतृत्वमाथि परेको छ। नयाँलाई अवसर दिने नीति लिइए सोलुखुम्बुका गोम्बु शेर्पा, मोरङकी गीता तिम्सिना, उदयपुरका राजन किराती र सुनसरीकी सपना दर्जीको सम्भावना बलियो रहेको बताइएको छ।

‘पटक–पटक मन्त्री भएकाहरूलाई नै पठाइरहँदा कार्यकर्तामा राम्रो सन्देश जाँदैन। त्यसैले सक्षम र नयाँ अनुहारलाई प्राथमिकता दिनुपर्छ भन्ने हाम्रो सुझाव छ,’ बैठकमा सहभागी एक सांसदले भने।

मुख्यमन्त्री हिक्मतकुमार कार्की नेतृत्वको सरकारमा एमालेबाट सहभागी मन्त्रीहरू भने तत्काल नहट्ने भएका छन्। एमालेबाट अहिले मुख्यमन्त्रीसहित चार मन्त्री र एक राज्यमन्त्री छन्।

आर्थिक मामिला मन्त्री विदुरकुमार लिङ्थेप, खानेपानी मन्त्री तिलचन पाठक, आन्तरिक मामिला मन्त्री इन्द्रमणि पराजुली, सामाजिक विकास मन्त्री रामप्रसाद मेहता र राज्यमन्त्री उमाकान्त गौतमको जिम्मेवारी यथावत् रहनेछ।

आजको संसदीय दलको बैठकले मन्त्रीका लागि नाम सिफारिस गरेपछि सम्भवतः सोमबारसम्ममा मन्त्रिमण्डल विस्तार हुने सम्भावना छ।