कोशीमा मन्त्री छनोट गर्न नेकपा संसदीय दलको बैठक, सोमबारसम्म नाम टुंग्याउने

विराटनगर । कोशी प्रदेश सरकार विस्तारको तयारी भइरहेका बेला सत्ता साझेदार नेपाली कम्युनिस्ट पार्टी (नेकपा) ले मन्त्री छनोटका लागि शनिबार संसदीय दलको बैठक बसेको छ । मोरङको कटहरीस्थित प्रदेशसभा सचिवालयमा दिउँसो ४ बजेदेखि सुरु भएको बैठक करिब तीन घण्टा चले पनि आकांक्षी धेरै भएपछि मन्त्रीको नाम भने टुंगो लाग्न सकेन ।

सत्ता साझेदार नेकपा एमालेले नेकपालाई चारवटा मन्त्रालय दिने सहमति गरेपछि मन्त्री बन्न आकांक्षी सांसदहरूको दौडधुप बढेको छ । नेकपामा १७ सांसद छन् । तीमध्ये पूर्वमाओवादीका १३ र पूर्वएकीकृत समाजवादीका चार सांसद छन् । आन्तरिक समझदारीअनुसार पूर्वमाओवादीबाट तीन र पूर्वएकीकृत समाजवादीबाट एक जना मन्त्री बन्नेछन् ।

बैठकपछि सञ्चारकर्मीसँग कुरा गर्दै नेकपा संसदीय दलका नेता इन्द्रबहादुर आङ्बोले मन्त्री छनोटका लागि सबै सांसदको राय लिइएको बताए । उनका अनुसार सरकारमा सहभागी गराउँदा सबैको अपनत्व हुने गरी समावेशिता र भौगोलिक सन्तुलन कायम गर्नुपर्ने सुझाव आएको छ ।

‘करिब तीन घण्टा सबै माननीयज्यूहरूको धारणा सुन्यौँ,’ आङ्बोले भने, ‘समावेशी र भौगोलिक सन्तुलन मिलाएर मन्त्री छनोट गर्नुपर्ने सुझाव आएको छ । सोमबारसम्म प्रदेश कार्यालय र संसदीय दलले मन्त्री तथा मन्त्रालयको अन्तिम टुंगो लगाउनेछ ।’

नेकपा कोशीका इन्चार्ज राजेन्द्र राईले एमालेसँग चार मन्त्रालय लिने सहमति भए पनि कुन–कुन मन्त्रालय लिने भन्ने विषयमा टुंगो लाग्न बाँकी रहेको बताए ।

पुराना दोहोर्‍याउने कि नयाँलाई अवसर ?

मन्त्री छनोटमा नेकपा नेतृत्वलाई पुराना र नयाँ अनुहारबीच सन्तुलन मिलाउन सकस परेको छ । पूर्वमन्त्रीहरू जीवन आचार्य, बाबुराम गौतम र दुर्गा चापागाईं पुनः सरकारमा जाने प्रयासमा छन् । तर दलभित्र भने यसपटक नयाँ अनुहारलाई अवसर दिनुपर्ने दबाब बढेको छ ।

नयाँलाई प्राथमिकता दिइए सोलुखुम्बुका गोम्बु शेर्पा, मोरङकी गीता तिम्सिना, उदयपुरका राजन किराती र सुनसरीकी सपना दर्जीको सम्भावना बलियो देखिएको छ ।

बैठकमा सहभागी एक सांसदका अनुसार पटक–पटक मन्त्री भइसकेकालाई दोहोर्‍याउँदा राम्रो सन्देश नजाने धारणा अधिकांश सांसदले राखेका छन् ।

यता, पूर्वएकीकृत समाजवादीबाट एक मन्त्रीका लागि खिनु लङवा लिम्बु र विद्या चाम्लिङबीच प्रतिस्पर्धा देखिएको छ । इलामबाट प्रत्यक्ष निर्वाचित लिम्बु र मोरङकी समानुपातिक सांसद चाम्लिङ दुवैले मन्त्रीका लागि आफ्नो दाबी कायमै राखेका छन् ।

मुख्यमन्त्री हिक्मतकुमार कार्कीले नेकपाबाट मन्त्रीको नाम प्राप्त हुनासाथ मन्त्रिमण्डल विस्तार गर्ने तयारी गरेका छन् । हाल एमालेबाट मुख्यमन्त्रीसहित चार मन्त्री र एक राज्यमन्त्री सरकारमा छन् । उनीहरूको जिम्मेवारी भने यथावत् रहने बताइएको छ ।

नेकपाले सोमबारसम्म मन्त्रीको नाम सिफारिस गरे सोही दिन नयाँ मन्त्रीलाई शपथ गराउने तयारी मुख्यमन्त्री कार्कीको छ ।