मुख्यमन्त्री कार्कीलाई दिएको समर्थन फिर्ता लिने कांग्रेसको तयारी, पुनः विश्वासको मत आवश्यक

विराटनगर । नेपाली कांग्रेसले कोशी प्रदेशका मुख्यमन्त्री हिक्मतकुमार कार्की नेतृत्वको सरकारलाई दिएको समर्थन फिर्ता लिने तयारी गरेपछि मुख्यमन्त्री कार्कीले पुनः प्रदेशसभाबाट विश्वासको मत लिनुपर्ने अवस्था बन्ने भएको छ ।

कांग्रेस कोशी प्रदेशका सभापति तथा संसदीय दलका नेता उद्धव थापाले आगामी भदौ ३ गते बस्ने संसदीय दलको बैठकबाट सरकारलाई दिएको समर्थन औपचारिक रूपमा फिर्ता लिने निर्णय गरिने बताएका छन् । समर्थन फिर्ता लिएपछि कांग्रेस प्रदेशसभामा प्रमुख प्रतिपक्षी दलको भूमिकामा रहने उनले स्पष्ट पारे ।

सोमबार नयाँ मन्त्रीहरूको शपथग्रहण समारोहपछि सञ्चारकर्मीसँग कुरा गर्दै थापाले कांग्रेस सरकारमा सहभागी नहुने र अब प्रतिपक्षको भूमिकामा रहने बताए ।

“कोशी प्रदेशमा नेपाली कांग्रेस अब प्रमुख प्रतिपक्षी दलको हैसियतमा बसेर काम गर्छ,” थापाले भने, “समर्थन फिर्ता लिने सम्बन्धमा भदौ ३ गते हाम्रो संसदीय दलको बैठक बस्दैछ । सोही बैठकबाट औपचारिक निर्णय गरेर समर्थन फिर्ता लिनेछौँ ।”
समर्थन फिर्ता लिएपछि मुख्यमन्त्रीले संवैधानिक व्यवस्थाअनुसार प्रदेशसभाबाट पुनः विश्वासको मत लिनुपर्ने थापाले बताए ।

प्रजातन्त्रमा बलियो प्रतिपक्ष आवश्यक हुने उल्लेख गर्दै उनले सरकारका कामकारबाहीमा खबरदारी गर्न र आवश्यक सुझाव दिन कांग्रेसले सशक्त भूमिका खेल्ने बताए ।

“सरकारमा नरहेपछि प्रतिपक्षको भूमिकामा छौँ भन्नु नै उपयुक्त हुन्छ,” उनले भने, “प्रदेशसभा वा संघीय संसद् प्रतिपक्षविहीन हुनुपर्छ भन्ने कांग्रेसको मान्यता होइन । सरकारलाई खबरदारी गर्न, अनुशासित बनाउन र विभिन्न सुझाव दिन एउटा दह्रो प्रतिपक्ष आवश्यक छ ।”

कोशी प्रदेशमा एमाले र नेपाली कम्युनिस्ट पार्टी (नेकपा) बीच नयाँ सत्ता समीकरण बनेपछि सोमबार नेकपाबाट चार मन्त्री र एक राज्यमन्त्रीले शपथ लिएका छन् । नयाँ सत्ता समीकरणअनुसार मन्त्रिपरिषद् विस्तार भएसँगै कांग्रेस सरकारबाट बाहिरिएको हो ।