कोशीका मुख्यमन्त्री कार्कीले शुक्रबार विश्वासको मत लिने

विराटनगर । सत्ता साझेदार दल परिवर्तन भएपछि कोशी प्रदेशका मुख्यमन्त्री हिक्मतकुमार कार्कीले शुक्रबार प्रदेशसभाबाट विश्वासको मत लिने तयारी गरेका छन् । 

मुख्यमन्त्री निकट नेकपा एमालेका सांसद रेवतिरमण भण्डारीले शुक्रबार विश्वासको मत लिने गरी तयारी भइरहेको जानकारी दिएका छन् ।

सांसद भण्डारीका अनुसार सत्ता साझेदार दल परिवर्तन भएकाले मुख्यमन्त्रीले विश्वासको मत लिन लागेका हुन् । नेपाली कांग्रेसले सरकारलाई दिएको समर्थन औपचारिक रूपमा फिर्ता नलिए पनि नेकपा सरकारमा सहभागी भइसकेकाले नैतिकताका आधारमा विश्वासको मत लिन लागिएको उनको भनाइ छ ।

‘नेपाली कांग्रेसले अहिलेसम्म समर्थन फिर्ता लिइसकेको छैन, तर नेकपा सरकारमा सहभागी भइसकेकाले नैतिकताका आधारमा मुख्यमन्त्रीज्यूले विश्वासको मत लिनुहुनेछ,’ भण्डारीले भने ।

सोमबार नयाँ मन्त्रीहरूको शपथग्रहणपछि पत्रकारसँग कुरा गर्दै मुख्यमन्त्री कार्कीले पनि आफूले चाँडै विश्वासको मत लिने बताएका थिए ।

यता, सरकारलाई समर्थन दिँदै आएको नेपाली कांग्रेसले भने अहिलेसम्म समर्थन फिर्ता लिएको छैन । यसबारे निर्णय गर्न कांग्रेसको कोशी प्रदेश संसदीय दलको बैठक मंगलबार बस्ने संसदीय दलका नेता उद्धव थापाले बताए ।

थापाका अनुसार मुख्यमन्त्री कार्कीले विश्वासको मतका लागि कांग्रेससँग आग्रह गरिसकेका छन् । ‘यसअघि प्रतिनिधिसभामा पुष्पकमल दाहाल प्रचण्डलाई समर्थन गरेर पनि कांग्रेस प्रमुख प्रतिपक्षी भएर बसेको नजिर छ, कोशीमा पनि त्यस्तै अवस्था आउन सक्छ,’ उनले भने ।

यद्यपि, कांग्रेस संसदीय दलका उपनेता हिमाल कार्कीले भने मंगलबार बस्ने बैठकले सरकारलाई दिएको समर्थन फिर्ता लिने निर्णय गर्न सक्ने बताएका छन् ।

अर्कोतर्फ, सत्ता साझेदार दल नेपाली कम्युनिस्ट पार्टी (नेकपा) का संसदीय दलका नेता इन्द्रबहादुर आङ्बोले मुख्यमन्त्रीले विश्वासको मत लिने विषयमा मंगलबार नै छलफल हुने जानकारी दिएका छन् ।

मुख्यमन्त्री कार्की संविधानको धारा १६८ को उपधारा (५) बमोजिम मुख्यमन्त्री नियुक्त भएका हुन् ।