कोशी प्रदेशका मुख्यमन्त्री कार्कीले आज विश्वासको मत लिने

विराटनगर । कोशी प्रदेशका मुख्यमन्त्री हिक्मतकुमार कार्कीले आज (सोमबार) प्रदेश सभाबाट विश्वासको मत लिँदै छन् ।

मुख्यमन्त्री कार्यालयले शुक्रबार प्रदेश सभा सचिवालयलाई औपचारिक जानकारी गराएको छ । नयाँ सत्ता समीकरण अनुसार नेकपा एमाले र नेपाली कम्युनिस्ट पार्टीबीच भएको सहमतिअनुसार मुख्यमन्त्री कार्कीले गत सोमबार मन्त्रिपरिषद् हेरफेर गरेका  थिए । 

यसअघि नेपाली कांग्रेसले सरकारलाई दिएको समर्थन फिर्ता नलिएसम्म विश्वासको मत नलिने अडानमा रहेका कार्कीले, १७ जना सांसदसहित नेपाली कम्युनिस्ट पार्टी सरकारमा सहभागी भएसँगै विश्वासको मत लिने तयारी गरेका हुन् ।
​
कशी प्रदेश सभाको नवौँ अधिवेशनको २६ औँ बैठकको  कार्यसूची अनुसार सोमबार दिउँसो १ बजे प्रदेश सभा बैठक बस्दैछ । 

नेपालको संविधानको धारा १६८ को उपधारा ४ तथा कोशी प्रदेश सभा नियमावली, २०७४ को नियम १२८ बमोजिम मुख्यमन्त्री कार्कीले विश्वासको मत लिन लागेका हुन् । 

​हाल ९३ सदस्यीय प्रदेश सभामा नेकपा एमालेका ४० र नेपाली कम्युनिस्ट पार्टीका १७ गरी कुल ५७ जना प्रदेश सभा सदस्यको स्पष्ट समर्थन कार्कीको पक्षमा छ ।

कोशी प्रदेश सभामा काँग्रेस २९, राप्रपा सभामुखसहित ५ र जसपाको १ सांसद छन् ।