नेपाल लोकतन्त्रवादी किरात राई सङ्घको प्रथम केन्द्रीय महाधिवेशन भदौ १५ मा धरानमा

धरान । देशभक्त र जनपक्षीय नयाँ पुस्ताको कुशल नेतृत्व चयन गर्ने एजेण्डासहित नेपाल लोकतन्त्रवादी किरात राई सङ्घको प्रथम ऐतिहासिक केन्द्रीय महाधिवेशन आगामी भदौ १५ गते धरानमा आयोजना हुने भएको छ ।

नेपाली कांग्रेसको भ्रातृ संगठन नेपाल लोकतन्त्रवादी आदिवासी जनजाति महासङ्घअन्तर्गत रहेको सङ्घले शनिबार धरानमा पत्रकार सम्मेलन गर्दै भदौ १५ गते सोमबार धरानमा महाधिवेशन आयोजना गर्न लागिएको जनाएको हो ।

महाधिवेशनमा कोशी प्रदेशका १४ जिल्लाका निर्वाचन क्षेत्रबाट ३/३ जना प्रतिनिधि, एउटामात्र निर्वाचन क्षेत्र रहेका स्थानबाट ४ जना र काठमाडौं उपत्यकाबाट प्रतिनिधि गरी १५० बढी प्रतिनिधि सहभागी हुने सङ्घका अध्यक्ष आनन्दसन्तोषी राईले बताए ।

सङ्घले धरानलाई ऐतिहासिक, सांस्कृतिक र राजनीतिक केन्द्रका रूपमा उल्लेख गर्दै नेपाली कांग्रेसको विचार, दर्शन र सिद्धान्तलाई बुझ्ने तथा पार्टीको विधान, नियम र निर्देशनअनुसार देश र जनताको सेवामा समर्पित राजनीतिक कार्यकर्ता निर्माण गर्ने उद्देश्यसहित महाधिवेशन आयोजना गर्न लागिएको जनाएको छ ।

'महाधिवेशनको बन्दसत्रमा सङ्घको विधान संशोधन तथा परिमार्जन, सांगठनिक प्रतिवेदन र आर्थिक प्रतिवेदन पारित गर्नुका साथै नयाँ नेतृत्व चयनको प्रक्रिया पूरा गरिनेछ ।' सङ्घका उपाध्यक्ष सुवास राईले भने ।

पत्रकार सम्मेलनमा जारी विज्ञप्तिअनुसार महाधिवेशनको उद्घाटन पार्टीका केन्द्रीय नेतासहित नेपाल लोकतन्त्रवादी आदिवासी जनजाति महासङ्घका केन्द्रीय अध्यक्ष ओमबहादुर घर्तीले गर्नेछन् । बिहान ९ बजेदेखि सुरु हुने कार्यक्रमको उद्घाटन रुखमा पानी हालेर गरिने जनाइएको छ ।

विज्ञप्तिमा नेपालमा विभिन्न संघर्ष र आन्दोलनपछि राजनीतिक परिवर्तनका लागि विश्वसिंह लाओ, बुद्धिमान राई साथै लिम्बू, मगर, गुरुङलगायत आदिवासी जनजाति समुदायको महत्वपूर्ण योगदान रहेको उल्लेख गरिएको छ ।

सङ्घले पार्टी र राज्यको नेतृत्वमा जिम्मेवारी लिन योग्य तथा सक्षम नयाँ पुस्ताको आवश्यकता रहेको जनाउँदै प्रथम महाधिवेशनबाट सक्षम नयाँ नेतृत्व निर्माण हुने विश्वास व्यक्त गरेको छ । 

पत्रकार सम्मेलनमा धरान उपमहानगरपालिकाका पूर्वनगरप्रमुख तिलक राई, किरात राई यायोक्खाका सुनसरी जिल्ला अध्यक्ष राजेन्द्रकुमार राईलगायत नेतहरूको उपस्थिति थियो । महाधिवेशन धरान-१० स्थित यलम्बर स्मृति सङ्ग्रहालयमा हुने बताइएको छ । महाधिवेशनलाई सफल बनाउन सञ्चारकर्मीको सहयोगका लागि पनि सङ्घले आग्रह गरेको छ ।