तिलक राई : ३६ वर्षको राजनीतिक यात्रापछि क्षेत्रीय सभापति निर्वाचित 

धरान । नेपाली कांग्रेसको राजनीतिमा ३६ वर्ष बिताएका धरानका पूर्वमेयर तिलक राई पार्टीको सुनसरी क्षेत्र नम्बर–१ को क्षेत्रीय सभापतिमा निर्वाचित भएका छन् ।

नेपाली कांग्रेसको १५औँ महाधिवेशनअन्तर्गत धरान सभागृहमा भएको निर्वाचनमा राईले ६६३ मत प्राप्त गर्दै प्रतिद्वन्द्वी विनोद आले मगरलाई ५५१ मतको फराकिलो अन्तरले पराजित गरेका हुन् । आले मगरले ११२ मत प्राप्त गरे । निर्वाचनमा कुल ७८० मत खसेको थियो । खसेको मतमध्ये राईले ८५ प्रतिशतभन्दा बढी मत प्राप्त गरेका छन् ।

क्षेत्रीय सभापतिमा निर्वाचित भएसँगै राईको काँधमा सुनसरी–१ मा कांग्रेसको संगठनलाई थप सुदृढ बनाउने जिम्मेवारी आएको छ । आगामी निर्वाचनलाई लक्षित गर्दै पार्टी संगठनलाई सक्रिय र व्यवस्थित बनाउने चुनौतीसमेत उनको नेतृत्वमा रहनेछ ।

राई कांग्रेसभित्र शालीन र संगठनमा लामो समयदेखि सक्रिय नेताका रूपमा परिचित छन् । उनले विसं २०४७ बाट राजनीतिक यात्रा सुरु गरेका थिए । राजनीतिक यात्राको सुरुवाती चरणमै उनले चुनावी प्रतिस्पर्धाको अनुभवसमेत लिएका थिए ।

विसं २०५४ को स्थानीय निर्वाचनमा उनले धरान–१८ को वडाध्यक्ष पदमा उम्मेदवारी दिएका थिए । पहिलो चुनावी प्रतिस्पर्धामा उनी पराजित भए । निर्वाचनमा पराजय भए पनि उनको राजनीतिक सक्रियता भने निरन्तर रह्यो ।

विसं २०५७ मा उनी नेपाल तरुण दल धरानको अध्यक्ष बने । त्यसपछि नेपाली कांग्रेस धरानको नगर सचिवको जिम्मेवारी सम्हालेका राई विसं २०७२ देखि नगर सभापति बने । लामो समय धरानको पार्टी संगठनमा काम गरेका उनले स्थानीय तहमा कांग्रेसको संगठन विस्तारमा भूमिका निर्वाह गरे ।

विसं २०७४ को स्थानीय तह निर्वाचनमा उनले नेपाली कांग्रेसका तर्फबाट धरान उपमहानगरपालिकाको मेयर पदमा उम्मेदवारी दिए । दोस्रो चुनावी प्रतिस्पर्धामा पनि उनी पराजित भए । त्यसपछि तेस्रो पटकको चुनावी प्रतिस्पर्धामा भने उनले सफलता हात पारे ।

विसं २०७६ मा भएको उपनिर्वाचनमा राईले २६ हजार ७०९ मत प्राप्त गर्दै धरान उपमहानगरपालिकाको प्रमुखमा निर्वाचित भए । उनले निकटतम प्रतिद्वन्द्वीलाई २ हजार ७९५ मतको अन्तरले पराजित गरेका थिए ।

राईको उक्त जित धरानको राजनीतिक इतिहासमा महत्त्वपूर्ण मानिन्छ । विसं २०४८ देखि कम्युनिस्ट पार्टीहरूको प्रभाव रहेको धरानमा नेपाली कांग्रेसबाट मेयर निर्वाचित हुने उनी पहिलो व्यक्ति बने । लामो समयदेखि कांग्रेसको संगठनमा सक्रिय रहेका राईका लागि मेयरको जित राजनीतिक यात्राको महत्त्वपूर्ण उपलब्धि बन्यो ।

मेयरको जिम्मेवारीमा रहँदा उनले धरानका स्थानीय विकास, पूर्वाधार र सामाजिक विषयमा काम गरे । स्थानीय राजनीतिक गतिविधिसँगै सर्दू जलाधार क्षेत्रको संरक्षणका विषयमा पनि उनी सक्रिय रहँदै आए । जलाधार क्षेत्रमा भूमाफियाको चलखेल र अनियन्त्रित प्लटिङ रोक्नुपर्ने विषयमा उनले निरन्तर आवाज उठाए । 

राईको राजनीतिक सक्रियता नेपाली कांग्रेसको संगठनमा मात्र सीमित छैन । उनी किरात राई यायोख्खाको केन्द्रीय अध्यक्षको जिम्मेवारीसमेत सम्हालिसकेका छन् । सामाजिक तथा सामुदायिक क्षेत्रमा पनि उनको लामो अनुभव छ ।

उनले नेपाल रेडक्रस सोसाइटी धरानको सचिव, धरान उद्योग वाणिज्य संघको सचिव तथा सप्तकोशी यातायात व्यवसायी संघको अध्यक्षका रूपमा समेत काम गरे । यी जिम्मेवारीले उनलाई राजनीतिक संगठनसँगै सामाजिक तथा व्यावसायिक क्षेत्रको संस्थागत अनुभवसमेत दिएको छ ।

लामो राजनीतिक यात्रामा विभिन्न जिम्मेवारी सम्हालेका राई अहिले कांग्रेस सुनसरी–१ को क्षेत्रीय नेतृत्वमा पुगेका छन् । नगर संगठनको नेतृत्वदेखि मेयरसम्मको जिम्मेवारी सम्हालिसकेका उनका लागि क्षेत्रीय सभापतिको नयाँ जिम्मेवारी पार्टी संगठनलाई क्षेत्रीय तहमा थप व्यवस्थित गर्ने अवसरका रूपमा आएको छ ।

क्षेत्रीय सभापतिमा निर्वाचित भएपछि राईले पार्टी संगठनलाई एकताबद्ध बनाउँदै आगामी निर्वाचनका लागि कार्यकर्ता र संगठनलाई तयारी अवस्थामा राख्नुपर्ने जिम्मेवारी पाएका छन् । ३६ वर्षको राजनीतिक यात्रापछि क्षेत्रीय नेतृत्वमा पुगेका राईको आगामी कार्यकालले सुनसरी–१ मा कांग्रेसको संगठनात्मक गतिविधिलाई कस्तो दिशा दिन्छ भन्ने विषयसमेत चासोको विषय बनेको छ ।