बीपी कोइराला स्वास्थ्य विज्ञान प्रतिष्ठानमा पदाधिकारी नियुक्त

सुनसरी । बीपी कोइराला स्वास्थ्य विज्ञान प्रतिष्ठान धरानमा रिक्त रहेका पदाधिकारी नियुक्त भएका छन् । प्रतिष्ठानका उपकुलपति प्रा.डा. स्मृति कार्कीको सिफारिसमा स्वास्थ्य तथा खाद्य स्वच्छता मन्त्री निशा मेहेताले मंगलबार शिक्षाध्यक्ष, रजिस्ट्रार र अस्पताल निर्देशक नियुक्त गरेकी हुन् ।

मन्त्री मेहेताले शिक्षाध्यक्षमा प्रा.डा. शिवेन्द्र झा, रजिस्ट्रारमा धरणीधर बराल र अस्पताल निर्देशकमा डा. इन्द्रकुमार लिम्बूलाई नियुक्त गरेकी हुन् । नवनियुक्त तीनै पदाधिकारीले मंगलबार नै मन्त्री मेहेतासमक्ष पद तथा गोपनीयताको शपथ ग्रहण गरेका छन् ।

तीनवटै पदका लागि उपकुलपति कार्कीले तीन–तीन जनाको नाम सिफारिस गरेकी थिइन् । शिक्षाध्यक्ष पदका लागि प्रा.डा. शिवेन्द्र झासहित प्रा.डा. कृष्णा पोखरेल र प्रा.डा. रोविन मास्केको नाम सिफारिस गरिएको थियो ।

त्यस्तै, रजिस्ट्रार पदका लागि धरणीधर बरालसँगै प्रा.डा. शम्शेर श्रेष्ठ र सागर ताम्राकारको नाम सिफारिसमा परेको थियो । अस्पताल निर्देशक पदका लागि डा. इन्द्रकुमार लिम्बूसहित डा. मधुर बस्नेत र सेराज अहमद खानको नाम सिफारिस गरिएको थियो ।

उपकुलपति कार्कीले सिफारिस गरेका नाममध्येबाट मन्त्री मेहेताले तीनै पदमा एक–एक जनालाई नियुक्त गरेकी हुन् ।
नवनियुक्त शिक्षाध्यक्ष प्रा.डा. झासँग प्रतिष्ठानको शैक्षिक क्षेत्रमा लामो समय काम गरेको अनुभव छ । उनले प्रतिष्ठानमा लामो समय शैक्षिक डिनका रूपमा जिम्मेवारी सम्हाल्दै चिकित्सा शिक्षा र शैक्षिक प्रशासनका क्षेत्रमा काम गरेका छन् ।

झा हाल प्रतिष्ठानको फरेन्सिक मेडिसिन विभागका विभागीय प्रमुखका रूपमा कार्यरत छन् । प्रतिष्ठानको शैक्षिक गतिविधि, चिकित्सा शिक्षा र शैक्षिक प्रशासनमा लामो अनुभव भएका कारण शिक्षाध्यक्षका रूपमा उनको नियुक्तिलाई महत्वपूर्ण रूपमा हेरिएको छ ।

नवनियुक्त रजिस्ट्रार धरणीधर बराल प्रतिष्ठानको स्कुल अफ पब्लिक हेल्थ एन्ड कम्युनिटी मेडिसिनमा एसोसिएट प्रोफेसरका रूपमा कार्यरत छन् । अस्पताल व्यवस्थापन र प्रशासनिक क्षेत्रमा समेत अनुभव भएका बराललाई प्रतिष्ठानको प्रशासनिक संयन्त्रलाई प्रभावकारी बनाउने जिम्मेवारी प्राप्त भएको छ ।
प्रतिष्ठानको शैक्षिक तथा कर्मचारी व्यवस्थापनमा समन्वय कायम गर्नुका साथै प्रशासनिक कामकारबाहीलाई व्यवस्थित बनाउने जिम्मेवारी अब बरालको काँधमा आएको छ ।

अस्पताल निर्देशकमा नियुक्त डा. इन्द्रकुमार लिम्बू प्रतिष्ठानको कलेज अफ डेन्टलमा प्रोस्थोडोन्टिक्स विभागका एसोसिएट प्रोफेसरका रूपमा कार्यरत छन् । उनले प्रतिष्ठानमा लामो समय डेपुटी अस्पताल निर्देशकका रूपमा काम गरिसकेका छन् ।
लिम्बूले प्रतिष्ठानको निमित्त प्रमुखको जिम्मेवारीसमेत सम्हालिसकेका छन् । पछिल्लो समय उनी निमित्त अस्पताल निर्देशकका रूपमा कार्यरत थिए ।

प्रतिष्ठानको अस्पताल प्रशासन र सेवा व्यवस्थापनमा लामो अनुभव भएका लिम्बूले यसअघि जिम्मेवारी सम्हाल्दा चिकित्सक, कर्मचारी, विद्यार्थी तथा सेवाग्राहीबाट सकारात्मक प्रतिक्रिया पाएका थिए । अस्पतालको दैनिक सेवा व्यवस्थापन, प्रशासनिक समन्वय र स्वास्थ्य सेवा प्रवाहलाई प्रभावकारी बनाउन उनले भूमिका निर्वाह गर्दै आएका छन् ।

तीन प्रमुख पदमा अनुभवी व्यक्तिहरू नियुक्त भएसँगै प्रतिष्ठानको शैक्षिक, प्रशासनिक तथा अस्पताल सेवामा सुधारको अपेक्षा गरिएको छ । प्रतिष्ठानमा लामो समयदेखि देखिँदै आएका समस्या समाधान गर्दै शैक्षिक गुणस्तर, प्रशासनिक सुशासन र स्वास्थ्य सेवा प्रवाहलाई प्रभावकारी बनाउने चुनौती भने नवनियुक्त पदाधिकारीसामु रहेको छ ।

नवनियुक्त शिक्षाध्यक्ष, रजिस्ट्रार र अस्पताल निर्देशकले आ–आफ्नो जिम्मेवारीमा प्रभावकारी समन्वय कायम गर्दै प्रतिष्ठानको शैक्षिक गुणस्तर, प्रशासनिक सुशासन र स्वास्थ्य सेवा सुधारलाई प्राथमिकताका साथ अघि बढाउनुपर्ने देखिएको छ ।