कोशी प्रदेशको आयोजनामा हुने अन्तरप्रदेश मुख्यमन्त्री सम्मेलनको तयारी पूरा

विराटनगर । कोशी प्रदेश सरकारको आयोजनामा आगामी असोज २७ र २८ गते विराटनगरमा हुने अन्तरप्रदेश मुख्यमन्त्री सम्मेलन–२०८३ को तयारी पूरा भएको छ ।

मुख्यमन्त्री तथा मन्त्रिपरिषद्को कार्यालयले आइतबार पत्रकार सम्मेलन गरी सम्मेलनको तयारी पूरा भएको जानकारी दिएको हो । सम्मेलनमा सातै प्रदेशका मुख्यमन्त्री, मुख्य न्यायाधिवक्ता, प्रदेश नीति तथा योजना आयोगका उपाध्यक्ष र प्रमुख सचिव सहभागी हुनेछन् ।

संघीय शासन प्रणालीलाई प्रभावकारी बनाउँदै प्रदेशहरूबीच सहकार्य, समन्वय र साझेदारी सुदृढ गर्ने उद्देश्यले सम्मेलन आयोजना गर्न लागिएको हो । नेपालको संविधानले परिकल्पना गरेको सहकारिता, सहअस्तित्व र समन्वयमा आधारित संघीयताको प्रभावकारी कार्यान्वयनमा सम्मेलनले योगदान पुर्‍याउने अपेक्षा गरिएको छ ।

सम्मेलनमा प्रदेशहरूले शासन सञ्चालनका क्रममा प्राप्त गरेका अनुभव, सफल अभ्यास र साझा चुनौतीबारे छलफल हुनेछ । संविधानप्रदत्त अधिकारको प्रभावकारी प्रयोग, संघ, प्रदेश र स्थानीय तहबीच अधिकार तथा जिम्मेवारीको स्पष्टता, कानुनी तथा नीतिगत सुधार र वित्तीय संघीयताको कार्यान्वयनका विषय पनि छलफलमा समेटिनेछन् ।

त्यसैगरी, प्रदेशहरूबीच साझा हितका विकास आयोजना तथा कार्यक्रमको पहिचान र कार्यान्वयन, अन्तरप्रदेश पूर्वाधार विकास, व्यापार तथा लगानी सहजीकरण, प्राकृतिक स्रोतको न्यायोचित उपयोग र लाभको बाँडफाँट, विपद् व्यवस्थापनमा सहकार्य तथा सुशासन र सार्वजनिक सेवा प्रवाहका नवीन अभ्यास आदानप्रदानलाई प्राथमिकता दिइनेछ ।

प्रदेश सरकारको कार्यसम्पादन प्रभावकारी बनाउने, नागरिकलाई गुणस्तरीय सार्वजनिक सेवा उपलब्ध गराउने, विकासका उपलब्धि जनतासम्म पुर्‍याउने र प्रदेशको आन्तरिक आय बढाउने सम्भावनाको उपयोग गर्नु सम्मेलनका मुख्य उद्देश्य रहेको विज्ञप्तिमा उल्लेख छ ।

सम्मेलनमा प्रस्तुत हुने साझा एजेन्डा, प्रस्तावित कार्ययोजना र प्रतिबद्धतामार्फत प्रदेशहरूबीचको सहकार्यलाई नियमित, व्यवस्थित र परिणाममुखी बनाउने पहल गरिने जनाइएको छ ।

कोशी प्रदेश सरकारले सातै प्रदेशको सक्रिय सहभागितामा सम्मेलनलाई उपलब्धिमूलक बनाउने प्रतिबद्धता जनाएको छ । सम्मेलनमार्फत संघीयताको सुदृढीकरण, सुशासन, दिगो विकास, आर्थिक समृद्धि र नागरिकको जीवनस्तर सुधारका साझा लक्ष्य हासिल गर्ने सरकारको अपेक्षा छ ।