धरान नगर अस्पताल निर्माणमा अकर्मण्यता, बिपी प्रतिष्ठानबाट आउला त फिर्ता ?

धरान । धरान-१६ स्थित पन्चायत आधारभूत विद्यालय (भकारी स्कुल) लाई मर्ज गरेर नगर अस्पताल बनाउने विषय बाहिरिएपछि धरानमा विवाद उत्पन्न भइरहेको छ । 

यसअघि धरानको छाताचोकस्थित पुरानो अस्पताललाई नगर अस्पताल बनाउने विषय टुंगो नलागिरहेको अवस्थामा धरान नगर अस्पतालको विषय पेचिलो बन्दै गएको छ । 

धरानमा नगर अस्पताल नहुँदा धरानेले स्वास्थ्य बिमा सेवा धरानमै प्राप्त गर्न नसक्ने विषय प्रकाशमा आएको थियो । 

हाल अस्पताल धरान उपमहानगरले हकभोग गरिरहेको छ । धरानले प्रसुति गृह सञ्चालन गरिरहेको छ । 

धरानमा नगर अस्पताल बनाउने विषयमा स्थानीयले पहल गरिरहे पनि सार्थकता पाउन सकेको छैन । २०७४ सालमा बिपी प्रतिष्ठानको नाममा नाम सारी भएको पुरानो अस्पताल प्रतिष्ठानले धरान उपमहानगरलाई फिर्ता गर्नुपर्ने हुन्छ ।

धरानका स्थानीय पूर्वजिल्ला जनस्वास्थ्य प्रमुख डा. श्रीराम साहले राजनीतिक  दलको सहयोगमा अभियान चलाइरहेका छन् । उनका अनुसार धरान उपमहानगरले जग्गा फिर्ता ल्याउन पहल गर्ने निर्णय गरेर फाइल कोशी प्रदेशको प्रमुख सचिवको कार्यालयसम्म पुगेको छ । 

शुक्रबार पुरानो अस्पताल परिसरस्थित प्रसुति गृहमा आयोजित छलफलमा रास्वपाका नेता शरिन तामाङले नगर अस्पतालको विषयमा स्वास्थ्यमन्त्रीलाई ध्यानाकर्षण गराएको बताए । उनले स्वास्थ्यमन्त्री बिपी प्रतिष्ठानको भ्रमणमा छिट्टै आउने जानकारी दिए । सो सन्दर्भमा धरान नगर अस्पतालको विषयसमेत प्रभावकारी रुपमा उठ्ने बताए । 

'बहिरा बालबालिका पढ्ने स्कुल अर्को संस्थाको भवनमा बसिरा'छ, मानसिक सन्तुलन गुमाएका विद्यार्थी पढ्ने विद्यालय भाडामा बसिरहेको छ ।' छलफलमा शरिनले भने, 'प्रसुति गृहलाई नगर अस्पताल बनाऔं, पुरानो विद्यालयलाई मास्नु हुँदैन ।' 
छलफलले धरान नगर अस्पताल निर्माणका लागि पहल समिति गठन गरी सम्बन्धित मन्त्रालयमा ज्ञापनपत्र बुझाउने अनौपचारिक निर्णय गरेको छ । 

शुक्रबार धरानका सरोकारवाला राजनीतिक दल, समाजसेवी, जनप्रतिनिधि र स्थानीयको छलफलले पुरानो अस्पताललाई नै नगर अस्पताल निर्माण गर्नुपर्ने माग गरेका छन् ।