सुदूरपूर्वको दुर्गम फालेलुङस्थित पापुन्देन आधारभूत विद्यालयमा पुग्यो पुस्तकालय

फालेलुङ (पाँचथर) । पाँचथरको सदरमुकाम फिदिमबाट झण्डै २१ किलोमिटर पूर्वमा आकाशे भञ्ज्याङ छ । भञ्ज्याङबाट ४ किलोमिटर अगाडि बढेपछि बिहीदिन बजार आउँछ । बिहीदिनबाट देब्रे लागेपछि हेवा खोलाको पुछारमा छ फालेलुङ-७ मा पर्ने पापुन्देन । शुक्रबार पापुन्देनको खोंज नरसिंगाको ध्वनिले गुन्जायमान बन्यो । पञ्चे बाजासँगै च्याब्रुङको सङ्गीतमा पापुन्देनमा खुसीयाली छायो । 

दूरदेश 'बेलायत' बाट आउने प्रमुख अतिथिको पर्खाइमा झण्डै १२ बजिसकेको थियो । गाउँले च्याब्रुङ बिसाएर आँखाहरूलाई उकालो लगाइरहेका थिए । पञ्चेबाजा बिसाएकाहरू पनि भिरालो बाटोतर्फ आँखा लगाइरहेका थिए । 

अफ्ठ्यारो बाटो हिंड्दै आएकी प्रमुख अतिथि देख्नासाथ कालिगड नरसिङ्गाको धुतुरी बजाउन थाले । सनई,  ट्याम्को, दमाहा, झ्याम्टा, ढोलकी बाजा बज्न थाले । यक्थुङ युवा च्याब्रुङ बजाउन थाले । गाउँले गुराँसका फूलले पाहुनालाई स्वागत गरिरहेका थिए । पापुन्देनवासीले आगन्तुकका गलामा गुँरासका माला र छातीमा सिलाम साक्मा लगाइदिए । 

कार्यक्रमस्थल पापुन्देन आधारभूत विद्यालयको आँगनमा प्रमुख अतिथि शान्ति लिम्बू पुगेपछि कार्यक्रमले औपचारिकता लियो । 

फालेलुङ-७  पापुन्देनस्थित श्री पापुन्देन आधारभूत विद्यालयमा पुस्तकालय स्थापना गरिएको छ । पाँचथर सेवा समाज युकेको आर्थिक सहयोगमा निर्माण भएको पुस्तकालयसँगै शौचालय निर्माण गरिएको छ । 

सन् २०२४ मा पाँचथर सेवा समाज युकेको अध्यक्ष थिइन् शान्ति लिम्बू । पापुन्देन आधारभूत विद्यालयका तर्फबाट विद्यालय व्यवस्थापन समितिका अध्यक्ष तेजबहादुर आङ्बोले बालबालिकालाई न्यानो कपडा माग गरेका थिए । तत्कालीन अध्यक्ष शान्ति लिम्बूले ग्रामीण र दुर्गम क्षेत्रमा रहेको विद्यालयको निवेदन माग आएपछि आफ्नो पुर्ख्यौली थलोमा न्यानो कपडासँँगै थप भौतिक निर्माण गर्न सकिन्छ कि भन्ने छलफल गरिन् । कार्यसमितिले एउटा पुस्तकालयसँगै शौचालय निर्माण गर्ने निर्णय गर्‍यो । 

शुक्रबार विद्यालयमा आयोजित पुस्तकालय उद्घाटन तथा पोशाक वितरण कार्यक्रममा अध्ययनको पहुँचबाट बाहिर रहेका विद्यार्थी र समुदायलाई पुस्तकालयले ज्ञान आर्जनमा महत्त्वपूर्ण भूमिका निर्वाह गर्ने प्रमुख अतिथि लिम्बूले बताइन् ।

औपचारिक कार्यक्रममा ६५ जना बालबालिकालाई  विद्यालय पोशाक प्रदान गरिएको छ । पुस्तकालय भवन, शौचालय र विद्यालय पोशाक वितरणलगायतका कार्यक्रमको संयोजन स्थानीय युवा मनेश आङ्बोले गरेका थिए । पुस्तकालयमा विद्यार्थीलक्षित पुस्तकसँँगै विभिन्न विधाका पुस्तकहरू थप गरिने आङ्बोले बताए । 

१५ लाख रुपैयाँको लागतमा बनेको पुस्तकालयमा हाल ५ सय बढी पुस्तक छन् । विद्यालय व्यवस्थापन समितिका अध्यक्ष तेजबहादुर आङ्बोले विद्यार्थीलाई मात्र नभएर समुदायका शिक्षक, अभिभावकलाई समेत पुस्तक अध्ययन गर्न आह्वान गरे । 
'विद्यालयको छानो पनि चुहिने भएको छ, वडाको बजेटले भ्याउँदैन, विद्यालयको अन्य स्रोत छैन,' अध्यक्ष आङ्बोले दातालाई अनुरोध गर्दै भने, 'यहाँहरूकै सहयोगले स्कुलको छाना पनि लागोस् ।' उनले सरकारको आश नभएको बताए ।

विद्यालयको सम्मान 

पापुन्देन आधारभूत विद्यालयले पुस्तकालय उद्घाटनकै अवसरमा दातृसंस्था पाँचथर सेवा समाज युके र निवर्तमान अध्यक्ष शान्ति लिम्बूलाई सम्मान गरेको छ । 

विद्यालयको भौतिक पूर्वाधार निर्माणमा योगदान गरेको भन्दै उनीहरूलाई सम्मान गरिएको हो ।

यस्तै विद्यालय व्यवस्थापन समितिका पूर्वअध्यक्षहरू दिलबहादुर आङ्बो र शेरबहादुर लावती (मरणोपरान्त) लाई सम्मान गरिएको छ । पूर्वअध्यक्षहरू शन्तबहादुर आङ्बो, मङ्गलसिंह आङ्बो र मनराज आङ्बोलाई सम्मान गरिएको थियो ।