बिपी प्रतिष्ठानका कर्मचारी पनि छाताचोकमा आफ्नै अस्पताल बन्नु पर्ने पक्षमा

धरान । बिपी कोइराला स्वास्थ्य विज्ञान प्रतिष्ठानस्थित कर्मचारी कल्याण समाजले प्रतिष्ठानको स्वामित्वमा रहेको छाताचोकस्थित जग्गामा आफ्नै अस्पताल सञ्चालन गर्नुपर्ने भन्दै उपकुलपतिको ध्यानाकर्षण गराएको छ । 

यसअघि प्रतिष्ठानस्थित शिक्षक कल्याण समाजले छाताचोकको पुरानो अस्पताल परिसर २०४८ देखि बिपी प्रतिष्ठानकै रहेको दाबी गर्दै समाजले उक्त स्थानमा स्याटलाइट अस्पताल निर्माण गर्न माग गरेको थियो । कर्मचारी कल्याण समाजले शिक्षक कल्याण समाजको विज्ञप्तिमा ऐक्यबद्धता जनाएको छ ।

कर्मचारी समाजले प्रतिष्ठानको विकास निर्माणलाई अझै गति प्रदान गर्न प्रतिष्ठानको स्रोत साधनहरुको अधिकत्तम र प्रभावकारी प्रयोग हुनु पर्ने यस धारणा सार्वजनिक गरेको छ । 

समाजले प्रतिष्ठानको स्वामित्वमा रहेको धरान बजारको छाता चौकस्थित जग्गामा प्रतिष्ठानले आफ्‌नै धरान उपमहानगर स्तरीय अस्पताल संचालन गरी धरानका सर्वसाधरण जनतालाई उपचार सेवा उपलब्ध गराउन माग गर्दै उपकुलपतिसमक्ष अनुरोध र ध्यानाकर्षण गराएको हो ।