सरकारी कार्यक्रम होटलमा नगर्न संघीय मामिला तथा सामान्य प्रशासन मन्त्रालय परिपत्र

धरान । सरकारले फजुल खर्च नियन्त्रण गर्ने उद्देश्यले अबदेखि सरकारी बैठक, गोष्ठी र तालिमहरू होटल तथा रिसोर्टमा आयोजना गर्न रोक लगाएको छ ।

संघीय मामिला तथा सामान्य प्रशासन मन्त्रालयले आज एक परिपत्र जारी गर्दै आफ्ना मातहतका सबै निकाय, विभाग, र जिल्ला समन्वय समितिहरूलाई यस्तो निर्देशन दिएको हो ।

मन्त्रालयद्वारा जारी परिपत्रमा सरकारी खर्चलाई मितव्ययी, पारदर्शी र उपलब्धिमूलक बनाउनुपर्नेमा जोड दिइएको छ । 

'स्विकृत वार्षिक कार्यक्रम र अन्य बैठक, गोष्ठी, तालिम, सेमिनार लगायतका कार्यक्रमहरू सञ्चालन गर्दा होटल तथा रिसोर्टहरूको प्रयोग नगरी आफ्नै कार्यालय परिसर वा सरकारी संरचना भित्र रहेका सभाहल तथा तालिम केन्द्रहरूको प्रयोग गर्नु/गराउनुहुन निर्णयानुसार अनुरोध छ,' परिपत्रमा उल्लेख छ ।

मन्त्रालयका शाखा अधिकृत टंकराज पाण्डेद्वारा हस्ताक्षरित यो परिपत्र मन्त्रालय मातहतका सबै आयोग, विभाग, प्रतिष्ठान र समितिहरूलाई गरिएको छ । यस्तै राष्ट्रिय निजामती किताबखाना र निजामती कर्मचारी अस्पताल, सबै जिल्ला समन्वय समितिका कार्यालयहरू, मन्त्रालयका सबै महाशाखाहरूलाई परिपत्र गरिएको छ ।

'सरकारी ढुकुटीको फजुल खर्च कटौती गरी उपलब्ध स्रोतसाधनको अधिकतम उपयोग गर्ने सरकारको नीति अनुरूप यो कदम चालिएको हो ।' परिपत्रमा भनिएको छ ।

यो निर्णयसँगै अब सरकारी निकायहरूले आफ्नै सभाहल वा अन्य सरकारी भवनहरूमा मात्र औपचारिक कार्यक्रमहरू सञ्चालन गर्नुपर्नेछ । यसले निजी होटलहरूमा हुने ठूलो रकमको खर्च जोगिने विश्वास गरिएको छ ।