खुवालुङमा सांस्कृतिक संरचना निर्माणका लागि शिलान्यास

धरान । किरात मुन्दुमी आस्थाको केन्द्र खुवालुङ क्षेत्रमा विविध सांस्कृतिक संरचना निर्माणका लागि शिलान्यास गरिएको छ । किराती समुदायको संस्कृति र ज्ञान प्रणालीलाई प्रतिनिधित्व गर्ने गरी संरचना निर्माण गर्न लागिएको हो । 

मंगलबार खुवालुङ जग्गा व्यवस्थापन एवं माङखिम निर्माण उप-समिति साथै किरात राई यायोक्खा केन्द्रीय कार्यसमिति काठमाडौँको आयोजनामा किरात राई सांस्कृतिक मौखिक ज्ञान सङ्ग्रहालय र माङखिमलगायतका संरचना निर्माणका लागि शिलान्यास गरिएको समितिका सदस्य दिनेश काम्दुङ राईले जानकारी दिए ।

माङखिममा किराती मुन्दुम र ज्ञान प्रणालीसम्बन्धी शिक्षा सञ्चालन गरिने राईले जानकारी दिए । सुनसरी, धनकुटा र उदयपुरको साझा स्थल त्रिवेणीमा अवस्थित खुवालुङमा आवासीय संरचना पनि निर्माण गरिने उनको भनाइ छ । 

सङ्ग्रहालयलगायतका संरचना निर्माणका लागि कोशी प्रदेश सरकारले दुई करोड ४० लाख रुपैयाँ बजेटमा विनियोजन गरेको छ ।  खुवालुङलाई मौलिक सांस्कृतिक केन्द्रका रूपमा विकास गर्दै देशकै महत्वपूर्ण सांस्कृतिक पर्यटकीय क्षेत्र बनाउने लक्ष्य राखिएको छ ।

माङखिमका लागि आवश्यक जग्गा किरात राई यायोक्खा केन्द्रीय कार्य समिति र व्यवस्थापन समितिले विभिन्न दाताबाट रकम सङ्कलन गरी खरिद गरेको छ । स्थानीय तीर्थराज राई, धर्मराज राई र देवराज राईले दुई रोपनी जग्गा दान गरेका छन् भने कुल ६ रोपनी जग्गा सुरक्षित गरिएको छ ।