गैरकानुनी रूपमा शुल्क उठाउने विद्यालयमाथि कारबाही गर्न निर्देशन

धरान । नेपाल सरकारको शिक्षा, विज्ञान तथा प्रविधि मन्त्रालयअन्तर्गतको शिक्षा तथा मानव स्रोत विकास केन्द्रले देशभरका विद्यालयहरूमा भइरहेको शुल्क असुलीको विषयमा गम्भीर चासो देखाउँदै तत्काल अनुगमन र कानुनी कारबाही अघि बढाउन निर्देशन दिएको छ । 

केन्द्रले देशभरका ७७ वटै शिक्षा विकास तथा समन्वय इकाइ र ७५३ वटै स्थानीय तहलाई औपचारिक पत्राचार गर्दै सामुदायिक तथा संस्थागत विद्यालयहरूले भर्ना लगायतका शीर्षकमा गैरकानुनी रूपमा शुल्क उठाइरहेको जनगुनासो प्राप्त भएकाले त्यसको सत्यतथ्य छानबिन गर्न निर्देशन दिएको हो ।

केन्द्रको विद्यालय शिक्षा मापदण्ड निर्धारण शाखाद्वारा जारी गरिएको उक्त परिपत्रमा देशका विभिन्न जिल्लाहरूबाट प्राप्त भएका गुनासोहरूलाई सम्बोधन गर्न स्थानीय तहसँग आवश्यक समन्वय गरी अनुगमन कार्यलाई प्रभावकारी बनाउन भनिएको छ । 

निर्देशक डा. श्यामप्रसाद आचार्यद्वारा हस्ताक्षरित सो पत्रमा विद्यमान कानुनको परिधिभित्र रही विद्यालयहरूले लिने शुल्कको अनुगमन गर्न र नियम विपरीत कार्य गर्नेहरूलाई कानुन बमोजिम सम्बोधन गर्न/गराउन स्पष्ट निर्देशन दिइएको छ । 

शैक्षिक सत्रको सुरुवातसँगै अभिभावकहरूले विद्यालयले मनोमानी शुल्क लिएको गुनासो गरिरहेका बेला सरकारले यो कदम चालेको हो ।