सरकारविरुद्ध धरानमा सुकुम्बासी आन्दोलित

धरान । धरानमा नेपाल बसोबास बस्ती संरक्षण समाजको नेतृत्वमा सुकुम्बासीहरूले आन्दोलन गरेका छन् ।

शनिबार आयोजित सर्वपक्षीय आन्दोलनले प्रधानमन्त्री र सरकारविरुद्ध नाराबाजी गरेको छ । धरानस्थित पुरानो अस्पतालबाट निकालिएको र्‍यालीले छाताचोक, पुरानो बजार हुँदै भानुचोकमा कोणसभा आयोजना गरेको छ ।

सुकुम्बासीलाई उठिबास गराउने क्रममा गरिब सुकुम्बासीहरूको हत्या भएको भन्दै नेपाल बसोबास बस्ती संरक्षण समाजका अध्यक्ष कुमार कार्कीले प्रधानमन्त्री वालेन्द्र शाहलाई कारबाहीको माग गरे । बसोबासको अधिकार कसैले खोस्न नपाउने भन्दै अध्यक्ष कार्कीले सुकुम्बासीलाई उठिबास होइन लालपुर्जा दिन माग गरे । 

१४ हजार ५ सय घरधुरी सुकुम्बासीको तथ्याङ्क रहेको धरानमा शनिबार निकालिएको र्‍यालीले बिना विकल्प सुकुम्बासीलाई उठिबास गराउने प्रधानमन्त्री वालेन्द्र शाहको राजीनामा माग गरेको छ । 'बालेन सरकार हत्यारा हो', 'डोजर आतंक बन्द गर', 'जबर्जस्ती उठिबास गर्ने सरकार मुर्दाबाद', 'आवास हाम्रो अधिकार हो' लगायतका नारा लगाउँदै र्‍याली निकालिएको थियो ।