प्रेसमाथि अवरोध नभएको प्रधानमन्त्रीको सचिवालयको भनाइ

धरान । प्रधानमन्त्री कार्यालय परिसरमा सञ्चारकर्मीहरूलाई भिडियो खिच्न अवरोध गरिएको भनी आएका समाचारहरूको प्रधानमन्त्रीको सचिवालयले खण्डन गरेको छ । 

सोमबार एक प्रेस नोट जारी गर्दै प्रधानमन्त्री वालेन्द्र शाहका प्रेस तथा अनुसन्धान विज्ञ दिपा दाहालले सञ्चारमाध्यममा आएका समाचारहरू अतिरञ्जित भएको र सरकार प्रेस स्वतन्त्रताप्रति प्रतिबद्ध रहेको स्पष्ट पारिन् ।

सचिवालयका अनुसार प्रधानमन्त्री कार्यालय प्रवेश गर्ने क्रममा परिसरमा सवारी साधनहरूको अत्यधिक भीडभाड देखिएपछि प्रधानमन्त्रीले सुरक्षाकर्मीसँग सवारी व्यवस्थापन र सुरक्षा सतर्कताबारे सामान्य जिज्ञासा मात्र राखेका थिए । 'यो चासो विशुद्ध प्रशासनिक सहजताका लागि मात्र भएको र सञ्चारकर्मीहरूलाई कार्यक्षेत्रबाट हटाउन वा भिडियो खिच्न रोक्न प्रधानमन्त्रीबाट कुनै निर्देशन नदिइएको'  प्रेस नोटमा उल्लेख छ ।

प्रधानमन्त्री कार्यकक्षमा प्रवेश गरेपछि सुरक्षाकर्मीले गेटमा रहेका सञ्चारकर्मीहरूलाई हट्न भनेको भन्ने गुनासो प्राप्त हुनासाथ सचिवालयले तत्काल समन्वय गरी अवरोध नगर्न निर्देशन दिएको बताइएको छ । सचिवालयले सञ्चारकर्मीहरूका लागि तोकिएको पहुँचमा कुनै कटौती नगरिएको र सूचना संकलनमा भविष्यमा पनि कुनै अवरोध नहुने विश्वास दिलाएको छ ।

सुरक्षा र व्यवस्थापनसँग जोडिएको सामान्य प्राविधिक विषयलाई प्रेसमाथिको 'अंकुश' का रूपमा व्याख्या नगर्न अनुरोध गर्दै सचिवालयले सरकार नागरिकको सूचनाको हक र लोकतान्त्रिक मूल्य मान्यता सुदृढ बनाउन सदैव क्रियाशील रहने प्रतिबद्धता समेत व्यक्त गरेको छ ।