बर्खाअघि नै टप्पुमा तटबन्ध !

धरान । प्री-मनसुन सुरु भइसकेको छ । सप्तकोशी नदी धमिलिएको छ । बर्खाअघि नै सप्तकोशीको सम्भावित कटान क्षेत्रमा रोकथामको काम थालिएको छ । 

वराहक्षेत्र-६ र ७ स्थित श्रीलङ्का टप्पुको चिलिया/ गरैया क्षेत्रमा बर्खाअघि नै तटबन्धको काम सुरु गरिएको हो । भारतको बिहार सरकारको जल संशाधन विभागले तटबन्धको काम सुरु गरेको हो । चिलिया टप्पुस्थित कोशी किनारबाट झण्डै ३ किलोमिटर दक्षिणसम्म तटबन्धको काम गरिने छ । यो तीन किलोमिटर क्षेत्रमा ठाउँठाउँमा त्रिखुट्टी र जाली लगाइने छ । 

शनिबार वराहक्षेत्र नगर प्रमुख रमेश कार्कीसहित जनप्रतिनिधिले निर्माणाधीन तटबन्धको अवलोकन गरेका छन् । दीर्घकालदेखि उच्च जोखिममा पर्दै आएको श्रीलङ्काटप्पु  क्षेत्रलाई सुरक्षित बनाउने लक्ष्यसहित वराहक्षेत्र नगरपालिकाको पहलमा भारतको बिहार सरकारले उक्त तटबन्ध निर्माण सुरु गरेको वराहक्षेत्र नगरप्रमुखको सचिवालयले जनाएको छ ।

वर्षायाममा नदीको तीव्र बहावका कारण पश्चिमतर्फको भू–भागमा हुने कटानलाई रोक्न उद्देश्यका साथ तटबन्ध निर्माण कार्य अगाडि बढाइएको नगर प्रमुखका प्रेस संयोजक संगम विष्टले जानकारी दिए । 

निर्माण सम्पन्न भएपछि कोसी नदीको बहावलाई बस्ती क्षेत्रमा प्रवेश गर्न नदिई बाढी तथा कटानबाट स्थानीय बासिन्दालाई सुरक्षित बनाउने अपेक्षा गरिएको छ । साथै, यस तटबन्धले आसपासका बस्ती तथा खेतीयोग्य जमिनको संरक्षण गर्नुका साथै नदीको धार परिवर्तनबाट उत्पन्न हुने समस्याको दीर्घकालीन समाधान गर्ने विश्वास गरिएको वराहक्षेत्र नगरप्रमुखको सचिवालयले जनाएको छ ।

श्रीलङ्का टप्पुमा १ हजार ८ सय घरधुरी कोशी कटानको जोखिममा रहेको अनौपचारिक तथ्याङ्क छ । 

श्रीलङ्का टप्पु, वरिपरि सप्तकोशी नदीले घेरेको नदी उकाश उर्वर भूमि हो ।  सुनसरी जिल्लाको वराहक्षेत्र नगरपालिका र उदयपुर जिल्लाको बेलका नगरपालिकाको भूभाग समेटिएको यो क्षेत्र कृषि र पशुपालनको क्षेत्रमा उर्वर मानिन्छ । 

विस १९८५ सालदेखि विभिन्न समयमा कोशी नदीमा आएको बाढीले टप्पुको अवस्थितिमा परिवर्तन गरिरहेको छ । वि.सं.  १९९०, २०११, २०२२, ०२४, ०२५, ०३८, ०४०, ०४२, ०४५, ०६५, ०७९, ०८१ सालमा सप्तकोशीमा बाढी आएको जानकारहरू बताउँछन् । प्रत्येक बर्खापछि सप्तकोशी नदीले धार परिवर्तन गर्दै आएको छ । कोशीको भेलसँगै श्रीलङ्का टप्पुका वासिन्दा आफ्नो बास र थात थलो सारिरहन बाध्य छन् ।