सरकारविरुद्ध सुकुम्बासी मुक्ति आन्दोलन गर्ने नेपाल बसोबास बस्ती संरक्षण समाजको चेतावनी

धरान । नेपाल बसोबास बस्ती संरक्षण समाजले ५ बुँदे  मागसहित आन्दोलनको घोषणा गरेको छ । 

सुकुम्बासी बस्तीहरूमा सरकारले चलाएको डोजर अभियानको विरोध गर्दै देशभर सशक्त आन्दोलनको घोषणा गरेको हो । 

माग पूरा गराउन समाजले दुई चरणको आन्दोलनका कार्यक्रमहरू समेत सार्वजनिक गरेको छ । पहिलो चरण अन्तर्गत सरकारको उठिबास अभियान विरुद्ध भेला, प्रदर्शन, राजनीतिक दलहरूसँग अन्तरक्रिया, ज्ञापनपत्र बुझाउने र शान्तिपूर्ण प्रतिकार गर्ने जस्ता कार्यक्रमहरू तय गरिएका छन् । 

यदि पहिलो चरणको आन्दोलनबाट मागहरू सम्बोधन नभए दोस्रो चरणमा सुकुम्बासी मुक्तिको अन्तिम घोषणासहित अझ सशक्त आन्दोलनमा होमिने चेतावनी समाजका अध्यक्ष कुमार कार्कीद्वारा हस्ताक्षरित विज्ञप्तिमा उल्लेख छ ।

समाजले एक प्रेस विज्ञप्ति जारी गर्दै काठमाडौं उपत्यका लगायत देशका विभिन्न स्थानमा कुनै विकल्प र छानबिन बिना नै अमानवीय शैलीमा घरहरू भत्काइएको भन्दै गम्भीर आपत्ति जनाएको छ । 

सरकारको यस कदमले ५० वर्षभन्दा पुरानो इतिहास बोकेका बस्तीहरू उजाडिएको, अर्बौँको भौतिक क्षति भएको र कतिपयले ज्यानसमेत गुमाउनु परेकाले यसको सम्पूर्ण जिम्मेवारी सरकारले लिनुपर्ने समाजको ठहर छ ।

आफ्नो हक अधिकारका लागि समाजले पाँचबुँदे माग अघि सारेको छ जसमा बिना विकल्प उठिबास गरिएका भौतिक संरचनाको उचित मूल्याङ्कन गरी तत्काल क्षतिपूर्तिसहित पुनःस्थापना गर्नुपर्ने मुख्य माग छ । 

साथै जोखिमयुक्त भनिएका क्षेत्रको निष्पक्ष छानबिन गर्न, ज्यान गुमाएका परिवारलाई क्षतिपूर्ति दिन र सुकुम्बासी मापनको स्पष्ट आधार तय गरी भूमि स्वामित्वको ग्यारेन्टी गर्न पनि माग गरिएको छ ।

समाजले एक वर्षभित्र देशलाई सुकुम्बासीमुक्त घोषणा गर्ने गरी कार्ययोजना ल्याउन र संविधानमा व्यवस्था भएको आवासको हक कार्यान्वयनका लागि स्पष्ट कानुनी मापदण्ड बनाउन सरकारलाई आग्रह गरेको छ ।