मोबाइल मर्मत केन्द्रबाट गाउँमै आत्मनिर्भर

चतरा । 'आभाष मोबाइल' नामक टिकटक आइडी खोल्ने बित्तिकै 'मिलियन भ्युज' गएको एउटा भिडिओ 'पिन' गरिएको देखिन्छ । मोबाइल फोन मर्मत गर्दै गरेको देखिने भिडिओमा 'भाग्य बनाउने भगवान'प्रति गुनासो गरिएको छ । 

आफ्नो भाग्य खोज्दै युवाहरू विदेशी भूमिमा पसिना बगाइरहेका छन् । तर एकजना युवा, मोबाइल फोन प्रविधिको सीप सिकेर गाउँमै आत्मनिर्भर छन् । 

उनी मोबाइल मर्मत गर्छन् र मोबाइल फोन बिक्री गर्छन् । अनि गाउँमै सन्तोषजनक आम्दानी पनि गर्छन् । मोबाइल प्रविधिकै प्रयोग गरेर आफ्नो व्यवसायको प्रचार गर्छन् । टिकटक आइडी 'स्क्रोल' गर्दै जाँदा उनले 'हेप्पी कस्टमर' अफर पनि सञ्चालन गर्दै आएको देखिन्छ ।  

युवाहरू गाउँमै आत्मनिर्भर हुने बाटो खोजिरहेका छन् । कृषि, पर्यटन र व्यावसायिक क्षेत्रमा युवाले आफूलाई परीक्षण गरिरहेका छन् । 

पछिल्ला केही वर्षदेखि सुनसरीको वराहक्षेत्र-२ चतरामा मोबाइल मर्मत तथा बिक्री केन्द्र सञ्चालन गर्दै आएका आभाष विष्टले आफ्नै भवनमा व्यावसायिक सेवा सुरु गरेका छन् ।

शुक्रबार नयाँ भवनमा मोबाइल केन्द्रको उद्घाटन गरेका आभाषले गाउँमै मोबाइल फोनको क्षेत्रमा गुणस्तरीय सेवा र नयाँ प्रविधिको सहज पहुँच पुर्‍याउने उद्देश्य राखेको बताए । 

आभाषका उमेरका युवा विदेशी भूमिमा पसिना बगाइरहेका छन् आभाष भने मोबाइल प्रविधिको सीप सिकेर गाउँमै सेवा दिइरहेका छन् । श्रीमती सुजताको पनि उनलाई साथ छ । दुवै दम्पति ग्राहकलाई आकर्षित गर्न विभिन्न अफर सञ्चालन गर्छन् । प्रत्येक ग्राहकलाई एउटा सामग्रीको खरिदमा एउटा कुपन तान्न लगाउँछन्, ग्राहक पनि खाली हात फर्किंदैनन् । 

मोबाइल मर्मत र बिक्रीका लागि उनीहरूले सामाजिक सञ्जालको प्रयोग गर्छन् । सेवाहरूका बारेमा युट्युब, फेसबुक, टिकटकलगायतका प्लेटफर्मबाट जानकारी गराउँछन् । 

भाडाको घरमा थियो- पसल । केही नजिकै उनले आफ्नै घर बनाए । 

'मोबाइल मर्मत र बिक्री गरेरै केही वर्षमा चार तलाको घर त ठडिंदैन तर आफ्नै घरमा सेवा सुरु गर्न पसलको आम्दानीले मनग्गे सहयोग र भरोसा दियो ।' आभाष भन्छन् ।

हुलाकको कर्मचारीबाट सेवा निवृत्त कृष्ण विष्ट, छोराको प्रगतिमा खुसी छन् । 'वराहक्षेत्र-१ बगुवा पुर्ख्यौली घर, जागिरको सिलसिलामा घरव्यवहार धरानै सार्न पर्‍यो । तर छोरा आभाषले भने आफ्नै गाउँ रोज्यो,' मख्ख पर्दै कृष्ण विष्ट भन्छन्, 'आज यी आफ्नै घरमा छोरोले व्यवसाय सुरु गर्न सक्यो ।' 

धरानकै एउटा मोबाइल तालिम केन्द्रमा तालिम लिएर आभाषले सीप सिके । अनि सीप बोकेर गाउँ फर्किए । उनले झण्डै एक लाख रुपैयाँ पुँजीबाट मोबाइल मर्मत केन्द्र स्थापना गरे । अहिले झण्डै एक करोडको पुँजी निर्माण गरेका छन् ।  मर्मत केन्द्रसहित मोबाइल बिक्रीका अलावा इलेक्ट्रोनिक्सका सामग्रीसमेत पसलमा थप गरेका छन् ।

आयआर्जनको बाटो समातेर नयाँ प्रविधिसँगै युवाले मिहिनेत र लगानी गरे आफ्नै गाउँमा प्रगति गर्न सकिने आभाष बताउँछन् ।