धरानमा प्याराग्लाइडिङ प्रिमियर लिग ओपन एक्युरेसी सिरिजको उद्घाटन

धरान । नेपालमै पहिलो पटक शुक्रबारदेखि धरानमा प्याराग्लाइडिङ प्रिमियर लिग ओपन एक्युरेसी सिरिज प्रतियोगिता सुरु भएको छ ।

 नेपाल प्याराग्लाइडिङ तथा ह्याङग्लाइडिङ संघको आयोजनामा सुरु भएको एक्युरेसि सिरिज प्रतियोगिता वैशाख २८ गतेसम्म चल्ने छ । 

धरान–४ स्थित छोटीमोरङमा सुरु भएको प्रतियोगितामा नेपाल र भारतका प्याराग्लाइडर खेलाडीहरुको सहभागिता छ । 

संघका केन्द्रीय अध्यक्ष भूपाल राईकाअनुसार थाउजेण्ड्स बिग बुद्ध नजिकैको डाँडाबाट प्रतियोगीले प्याराग्लाइडिङ गर्दै धरान–१४ मा पर्ने खत्रीधारा मैदानमा अवतरण गर्ने छन् । 

प्रतियोगितामा चार महिलासहित ३२ जनाले सहभागिता जनाएका छन् । प्रतिस्पर्धीहरू चार समूमा विभाजित छन् ।

साहसिक खेलकुदको विकास र पर्यटन प्रवर्द्धन गर्ने मुख्य लक्ष्यका साथ नेपाल प्याराग्लाइडिङ तथा ह्याङग्लाइडिङ संघले धरानमा 'नेपाल प्याराग्लाइडिङ प्रिमियर लिग (एनपीपीएल) ओपन एकुरेसी सिरिज-१' आयोजना गरेको हो । 

प्रतियोगितामा एकुरेसी ओभरल, महिला व्यक्तिगत, पुरुष टिम, र राष्ट्रिय पुरुष तथा महिला गरी विभिन्न विधामा विजेताहरूलाई नगद पुरस्कारका साथै ट्रफी, मेडल र प्रमाणपत्र प्रदान गरिने छ ।

१८औँ एसियाली खेलकुदमा पदक विजेता खेलाडीहरू समेत सहभागी हुने यस लिगलाई थप प्रतिस्पर्धी र आकर्षक बनाउन आयोजकले कुल ६ लाख २५ हजार रुपैयाँ बराबरको पुरस्कार राशि छुट्याएको छ । 

विगत चार दशकदेखिको प्याराग्लाइडिङ खेलको विकास र विस्तारको यात्रालाई निरन्तरता दिँदै आयोजित यो प्रतियोगिताका लागि राष्ट्रिय खेलकुद परिषद्, नेपाल पर्यटन बोर्ड, कोशी प्रदेश सरकारको पर्यटन, वन तथा वातावरण मन्त्रालय र धरान उपमहानगरपालिका लगायतका निकायहरूको साथ र सहकार्य रहेको बताइएको छ ।