फुटबल मैदानमै ढले धरान १६ का अनुपम गुरुङ,अस्पतालले गर्यो मृतक घोषणा

धरानः धरान–१६ का ३७ वर्षीय अनुपम गुरुङको शनिबार बेलुकी फुटबल मैदानमै निधन भएको छ।

धरानको जोरसखुवा चोक नजिकै पुलचोकस्थित खेलमैदानमा उनी फिटनेसका लागि नियमित अभ्यास गर्न जाने गर्थे। शनिबार पनि उनी आफ्नो ब्यागमा पानी बोकेर  मैदान पुगेका थिए।

साथीहरूसँग बल हान्ने अभ्यास चलिरहेको बेला उनले अचानक रिगटा लागेको भन्दै अभ्यास छाडे र छेउको ढुंगामा गएर बस्न पुगे। उनले घरबाट ल्याएको पानी पिएलगत्तै ढलेको देखेपछि मैदानमा रहेका अन्य खेलाडीहरू आत्तिएर नजिकै रहेको प्रहरी बिट र उनका परिवारलाई खबर गरेका थिए।

घटनास्थलमा रहेका रिजन गदाल भन्छन्, हामी खेल्दै थियौं, उहाँले पानी पिएपछि एक्कासी लड्नुभयो। वडा सदस्य पनि मैदानमै हुनुहुन्थ्यो, उहाँले तुरुन्त प्रहरीलाई खबर गर्नुभयो।

इलाका प्रहरी कार्यालय धरानका डिएसपी प्रकाश जबेगुका अनुसार गुरुङ खेलमा सक्रिय नभएको अवस्थामा ढलेका थिए। “उनले खेलिरहेका थिएनन्, बसिरहेका अवस्थामा ढलेको भन्ने सूचना आएको छ। घटनाको अनुसन्धान भइरहेको छ,” जबेगुले भने।

परिवारजन र प्रहरीको सहयोगमा उनलाई तत्काल अस्पताल पुर्‍याइए पनि चिकित्सकले मृत घोषणा गरेका थिए।

अनुपम गुरुङ दैनिक फुटबल अभ्यास गर्ने स्वस्थ जीवनशैली अपनाएका व्यक्ति थिए। मैदानमै भएको उनको अकस्मिक निधनले साथीभाइ, खेलप्रेमी र स्थानीय समुदायलाई स्तब्ध बनाएको छ।