आधुनिक आउटलेटमा तोङ्बा र याङ्बेन, धरानमा खुल्यो ७ करोडको लगानीमा 'नाल्बो होटल एण्ड रेस्ट्रो'

धरान । हिमाली र उच्च पहाडी क्षेत्रका ठूलाठूला रुखमा पाइने झ्याउलाई टिपेर, सफा गरेर, सुँगुरको मासु/ आन्द्राभुँडीसँगै नेपाली मसाला मिसाएर परपरी भुटेर तयार गरिएको परिकार 'याङ्बेन' अब धरानमै 'नाल्बो होटल एण्ड रेस्ट्रो'ले पस्कने भएको छ । 

पूर्वी नेपालमा समृद्ध सांस्कृतिक पहिचान बोकेको याक्थुङ लिम्बू जातिको जातीय परिकार उपलब्ध हुने गरी धरानको शान्तिपथमा खुलेको 'नाल्बो होटल एण्ड रेस्ट्रो' ले याङ्बेनसँगै तोङ्बा र सुकुटीसमेत पस्कने भएको छ । 

लिम्बू जातीय खानाका पारखीलाई लक्षित गरी तोङ्बा, याङ्बेन, सुकुटीजस्ता सांस्कृतिक जातीय परिकारलाई आधुनिक आउटलेटमा मौलिक तरिकाले पस्कने होटल एण्ड रेस्ट्रोका सञ्चालक लालप्रसाद नाल्बोले जानकारी दिए । जातीय परिकारमात्र नभएर मेन्यूमा इन्डियन, चाइनिज, कन्टिनेन्टल र नेपाली रैथाने खानाका परिकार पनि उपलब्ध हुने सञ्चालक नाल्बोले बताए । 

नाल्बोका अनुसार धरानको भानुचोक शान्तिपथमा ७ करोड रुपैयाँको लगानीमा होटल सञ्चालनमा आएको हो । होटलमा १९ वटा कोठा छन् । खानाका सबै परिकार, पेय पदार्थ र रेस्टुरेन्ट, बार र होटलका सबै सुविधा उपलब्ध हुनेछ ।

'१ हजार रुपैयाँदेखि ६ हजार रुपैयाँसम्मका कोठा छन्, सञ्चालक नाल्बोले भने, 'धरान घुम्न आउने नेपाली, भारतीय र तेस्रो मुलुकका पर्यटकलाई लक्षित गरी आधुनिक होटल सञ्चालनमा ल्याएका छौं ।'

शनिबार च्याब्रुङको धुनसँगै प्रमुख अतिथि धरान उपमहानगरपालिकाका कार्यवहाक प्रमुख अइन्द्रविक्रम बेघाले होटलको उद्घाटन गरे । उनले धरानको आतिथ्यता र पर्यटन व्यवसायमा नाल्बो होटलले एउटा इँटा थप्ने काम गरेको बताए । होटलको व्यावसायिक सफलताको शुभकामना दिँदै कार्यवहाक प्रमुख बेघाले धरान आउने पर्यटकलाई आकर्षक आतिथ्यता प्रदान गर्न आग्रह गरे । 

यसअघि 'नाल्बो ज्वेलर्स' स्थापना गरी सुनचाँदी व्यवसाय गर्दै आएका सफल व्यवसायी नाल्बोले हस्पिटालिटी सेक्टरमा पनि केही गरौं भन्ने उद्देश्यले होटल सञ्चालनमा ल्याएको बताए ।
 
'एकपटक भिजिट गरिदिनु होला,' नाल्बोले भने, 'धरानको पर्यटन व्यवसाय र आतिथ्यताको क्षेत्रमा रहेको ग्यापलाई नाल्बो होटलले परिपूर्ति गर्छ भन्ने विश्वास छ ।'