सभाहलमै संसद:‘विद्यालय शिक्षा विधेयक पारित गर्दै एस.ई.ई. स्पिकर-६ सम्पन्न

धरान, जेठ १२ ।धरानका विद्यार्थीहरूले मंगलबार भाषण मात्रै दिएनन्, संसद् पनि चलाए।
धरान–८ स्थित सहिद स्मृति माध्यमिक विद्यालयको सभाहल केही घण्टाका लागि वास्तविक संसद् जस्तै बनेको थियो, जहाँ विद्यार्थीहरूले शिक्षा नीतिमाथि बहस गरे, नियमापत्ति उठाए, मन्त्रीले जवाफ दिए र अन्ततः “विद्यालय शिक्षा विधेयक–२०८३” बहुमतले पारित समेत भयो।

यही फरक र रचनात्मक अवधारणासहित आयोजित धरान उप–महानगरव्यापी “एस.ई.ई. स्पिकर–२०८३, सिजन–६” को फाइनल मंगलबार सम्पन्न भएको हो। प्रतियोगिताको आयोजना -याडिकल लाईट नेपाल प्रा.लि. धरानले गरेको थियो।

प्रतियोगितामा पब्लिक हाईस्कुलबाट एस.ई.ई. उत्तीर्ण तमन्ना बान्तवा राई विजेता बनिन्।
धरान–६ स्थित सरस्वती मा.बि.बाट एस.ई.ई. उत्तीर्ण प्रीन्जा विश्वकर्मा फस्ट रनरअप, धरान–५ स्थित डिपी बिलिभर्स इङ्लिस स्कुलबाट एस.ई.ई.उत्तीर्ण खुशी लिम्बू सेकेन्ड रनरअप तथा जेम सेकेन्डरी बोर्डिङकी पुजा बान्तवा राई थर्ड रनरअप घोषित भइन्।
सब–टाइटलतर्फ सरस्वती मा.बि.की रचना श्रेष्ठ “मस्ट पङ्चुअल”, हिमालयन बोर्डिङकी जेनिसा थापा “मस्ट डिसिप्लिन” तथा हिबिस्कस इङ्लिस बोर्डिङ स्कुलकी फुङ्निमा लिम्बू बेस्ट प्रेजेन्टेसन घोषित भईन।
यस वर्ष प्रतियोगितालाई परम्परागत भाषण प्रतियोगिताभन्दा फरक बनाउँदै दुई चरणमा सञ्चालन गरिएको थियो। पहिलो चरणमा सहभागीहरूले गोलाप्रथाबाट प्राप्त शीर्षकमा आफ्नो धारणा प्रस्तुत गरेका थिए।

“सामाजिक सञ्जाल: अवसर कि चुनौती?”, “युवा र राष्ट्रप्रेम”, “देश विकासका लागि शिक्षा कि सीप?” र “युवाका लागि स्वदेशमा अवसर कि विदेशमा भविष्य?” जस्ता समसामयिक विषयमा विद्यार्थीहरूले तार्किक र प्रभावशाली प्रस्तुति दिएका थिए। उक्त चरण ७५ अंकको रहेको थियो।
प्रतियोगिताको दोस्रो तथा सबैभन्दा आकर्षक चरण “नमुना संसद्” रह्यो, जसले कार्यक्रमलाई पूर्णतः फरक पहिचान दियो।
नमुना सम्सदमा सभामुखको भुमिकामा रहेकी तमन्ना बान्तवा राईले बोल्न समय दिए पछि शिक्षा मन्त्रीको भूमिकामा रहेकी प्रीन्जा विश्वकर्माले “विद्यालय शिक्षा विधेयक–२०८३” प्रतिनिधि सभामा पेश गरेकी थिइन्। प्रधानमन्त्रीको भुमिकामा रहेकी खुशी लिम्बुले सम्सदको बैठकमा बिशेष सम्बोधन गरिन।त्यसपछि सभामुख तमन्ना बान्तवा राईले सांसदहरू रचना श्रेष्ठ, पुजा बान्तवा राई, फुङ्निमा लिम्बू, जेनिसा थापा, प्रमिसा राई र असक्ता राईलाई पालैपालो धारणा राख्न समय प्रदान गरेकी थिइन्।

छलफलका क्रममा सांसद पुजा राईले “दुई मिनेट मात्रै बोल्न दिइएको” भन्दै सभामुखसमक्ष नियमापत्ति जनाएकी थिइन्। त्यसपछि सभामुख तमन्नाले थप एक मिनेट समय उपलब्ध गराएकी थिइन्। उक्त दृश्यले सभाहललाई वास्तविक संसद्को अनुभूति दिलाएको उपस्थित दर्शकहरूले बताएका थिए।
सैद्धान्तिक छलफलपछि सांसदहरूले उठाएका प्रश्न र सुझाव समेट्दै शिक्षा मन्त्री प्रीन्जा विश्वकर्माले विधेयकलाई थप परिमार्जन गर्ने प्रतिबद्धता व्यक्त गरिन्। त्यसपछि सभामुख तमन्नाले विधेयक निर्णयार्थ प्रस्तुत गरेकी थिइन्। बिधेयकको पक्षमा बहुमत देखिए पछि सभामुखले “विद्यालय शिक्षा विधेयक–२०८३” बहुमतले पारित भएको घोषणा गरिन्।
आयोजक संस्था -याडिकल लाईट नेपाल प्रा.लि.का अध्यक्ष तिर्थ कार्कीले विद्यार्थीहरूको व्यक्तित्व, नेतृत्व क्षमता, तार्किक सोच र सार्वजनिक अभिव्यक्ति विकास गर्ने उद्देश्यले यस वर्षदेखि नमुना संसद् समावेश गरिएको बताए। उनका अनुसार प्रतियोगितालाई केवल भाषणमा सीमित नराखी व्यवहारिक नेतृत्व अभ्याससँग जोड्ने प्रयास गरिएको हो।

कार्यक्रमका प्रमुख अतिथि धरान उप-महानगरपालिकाका कार्यवाहक मेयर अइन्द्र विक्रम बेघा ले नमुना संसद् अत्यन्त रचनात्मक र प्रभावकारी लागेको प्रतिक्रिया दिए। उनले यस्ता कार्यक्रमले युवाहरूलाई लोकतन्त्र, बहस संस्कार र नेतृत्वबारे व्यवहारिक अनुभव दिने बताए।
विशेष अतिथि सहिद स्मृति मा.बि.का प्रधानाध्यापक राम विष्ट ले “कतिपय वर्तमान सांसदभन्दा नमुना संसद्का विद्यार्थीहरूले राखेका तर्क अझ परिपक्व लागेको” टिप्पणी गर्दै सहभागीहरूको प्रशंसा गरे।
एस.ई.ई. स्पिकर सिजन–२ की विजेता एङ्लिसा थापा ले प्रत्यक्ष नमुना संसद् हेर्दा फरक र प्रेरणादायी अनुभूति भएको बताइन्।
प्रतियोगिताको निर्णायकमा महेन्द्र बहुमुखी क्याम्पसका उप–प्राध्यापक राजेश विद्रोही र मकालु इङ्लिस बोर्डिङ इटहरीका शिक्षक जेपी काफ्ले रहेका थिए।

प्रतियोगितामा विजेताले नगद १० हजार रुपैयाँ, ट्रफी र प्रमाणपत्र प्राप्त गर्नेछन्। फस्ट रनरअपलाई ५ हजार, सेकेन्ड रनरअपलाई ३ हजार तथा थर्ड रनरअपलाई १ हजार ५ सय रुपैयाँसहित ट्रफी र प्रमाणपत्र प्रदान गरिने आयोजकले जनाएको छ। सब–टाइटल विजेताहरूलाई पनि जनही १ हजार रुपैयाँसहित प्रमाणपत्र प्रदान गरिनेछ।
विजेता तथा उप-विजेताहरूलाई प्रमुख अतिथि अइन्द्र विक्रम बेघा, सहिद स्मृति मा.बि.का प्रधानाध्यापक राम विष्ट तथा च्याम्पियन सेकेन्डरी स्कुलकी प्रिन्सिपल नाजु सुबेदीले ट्रफी, प्रमाणपत्र र खादा प्रदान गरी सम्मान गरेका थिए।
नगद पुरस्कार भने यही जेठ १५ गते शुक्रवार गणतन्त्र दिवसको अवसरमा प्रदान गरिने आयोजकले जनाएको छ।