'स्वर्णिम बजेट' ले समेटेका नयाँ दस बुँदा

धरान । सङ्घीय संसदको संयुक्त बैठकमा अर्थमन्त्री  डा. स्वर्णिम वाग्लेले शुक्रबार २१ खर्ब २४ अर्ब ३४ करोड रूपैयाँ बराबरको बजेट प्रस्तुत गरेका छन् । 

'स्वर्णिम बजेट' ले आगामी आर्थिक वर्षका लागि केही नयाँ शीर्षकमा उत्साहजनक सम्बोधन गरेको छ । सङ्घीय सदनका दुवै सभामा आव २०८३/८४ को बजेट प्रस्तुत गर्दै अर्थमन्त्री स्वर्णिम वाग्लेले भने- 'नेपाललाई आगामी ५ वर्षभित्रमा सुशासित, समुन्नत र स्वाभिमानी राष्ट्रमा रुपान्तरण गरिने' उल्लेख गरेका छन् । 

१. सूचना प्रविधि क्षेत्रमा कार्यरत जनशक्तिले प्राप्त गर्ने 'स्वेट एक्विटी'को रकमलाई कर योग्य आय गणनामा शत प्रतिशत छुट दिने घोषणा गरिएको छ । 

२. कृषि एवम् पशुजन्य उद्यम गर्न चाहाने १ हजार युवा उद्यमीलाई स्टार्टअप सुविधा उपलब्ध गराइने साथै विज्ञान प्रविधि र नवप्रवर्तनका लागि रु ४ अर्ब र नेपाल इन्टरप्राइज फेसेलिटीका लागि रु ५० करोड विनियोजन गरिएको छ ।

३. कृषियोग्य नदी उकास, उपयोगविहीन, बाँझो जग्गा उपयोग गर्न स्थानीय तहमा भूमि बैङ्क स्थापना गरिने, निजी क्षेत्रलाई कृषि क्षेत्रमा प्रोत्साहित गरिने उल्लेख छ । 

४. मध्यपहाडी लोकमार्गका १२ स्थानमा पहिचानयुक्त सडक निर्माण गर्ने त्यसका लागि १ अर्ब ८३ करोड विनियोजन गरिएको छ । 

५. देशका प्रमुख सहरमा फोहोरमैला व्यवस्थापन, नदी किनारामा हरियाली अभियान सञ्चालन गर्नका लागि ४ अर्ब १९ करोड विनियोजन गरिएको छ ।  

६. जेन्जी आन्दोलन र भूकम्पबाट क्षतविक्षत संरचना पुनर्निर्माणका लागि आवश्यक बजेट विनियोजन गरिएको बजेट भाषणमा उल्लेख छ । 

७. प्रवासमा रहेका नेपाली नागरिकलाई लोकतान्त्रिक प्रक्रियामा आवद्ध गराई मताधिकार सुरक्षित गर्न कानुनी, प्राविधिक तथा प्रशासनिक पूर्वाधार तयार गर्ने बजेटमा उल्लेख छ । 

८. प्रतिनिधि सभा सदस्य वैज्ञानिक महावीर पुनको माग बजेट भाषणले सम्बोधन गरेको छ ।  सङ्घीय सदनका दुवै सभामा बजेट प्रस्तुत गर्दै अर्थमन्त्री स्वर्णिम वाग्लेले विज्ञान, प्रविधि, अनुसन्धान र नवप्रवर्तनका लागि पुँजीगत खर्चको न्युनत्तम एक प्रतिशत रकम विनियोजन गरेको बताए ।

९. नेपाललाई एआईको युगमा आत्मविश्वासका साथ प्रवेश गराउन विशेष पहल गरिने बजेट भाषणमा उल्लेख छ ।

१०. सदनमा बजेट प्रस्तुत गर्दै अर्थमन्त्री स्वर्णिम वाग्ले भन्छन्- 'बजेटलाई मैले संवैधानिक औपचारिकताका रुपमा मात्र होइन, राज्यको चरित्र, शासकीय संस्कार,  अर्थतन्त्रको स्वरुप फेर्ने दायित्वका रुपमा हेरेको छु । यो बजेट स्वदेश र विदेशमा रहे बसेका नेपालीहरूले उत्पादनमुखी अर्थतन्त्र, अन्तर्राष्ट्रिय प्रतिष्ठा र प्रविधिमैत्री परिवर्तनबारे राख्ने गरेको जायज अपेक्षाको पत्यारिलो नीतिगत उपकरण बन्ने छ भन्ने विश्वास लिएको छु ।'