यातायात स्वतन्त्र मजदुर संगठनले भन्यो- सरकार, गणेश नेपालीको ह*त्यारा हो

काठमाडौं । नेपाल यातायात स्वतन्त्र मजदुर संगठनले राइडसेयर श्रमिक गणेश नेपालीको आत्मदाह घटनाको निष्पक्ष छानबिन गरी दोषीमाथि कानुनी कारबाही गर्न र पीडित परिवारलाई क्षतिपूर्ति उपलब्ध गराउन सरकारसँग माग गरेको छ । 

संगठनले ट्राफिक जरिवाना, सडकमा हुने दुर्व्यवहार र राज्यका दमनकारी संरचनाकै कारण नेपाली आत्मदाहजस्तो निर्मम बाटो रोज्न बाध्य भएको दाबी गर्दै सरकारलाई उनको हत्यारा करार दिएको छ।

संगठनले शुक्रबार विज्ञप्ति जारी गर्दै गणेश नेपालीको हृदयविदारक घटनाले देशभरका करिब १३ लाख यातायात श्रमिकलाई त्रसित बनाएको जनाएको छ। विज्ञप्तिमा ट्राफिक जरिवानाको नाममा सडकमा आतंक सिर्जना गर्ने, श्रमिकलाई अपराधीकरण गर्ने तथा गरिखाने वर्गमाथि चरम अपमान र अत्याचार गर्ने काम भइरहेको आरोप लगाइएको छ।

संगठनका अध्यक्ष भीमज्वाला राईले यातायात श्रमिक तथा सडक प्रयोगकर्तामाथि ट्राफिक जरिवानाको आतंक, अभद्र व्यवहार, अत्याचार र अपमान कति हदसम्म पुगेको थियो भन्ने उदाहरण गणेश नेपालीको आत्मदाह घटनाले स्पष्ट पारेको बताएका छन्। गरिखाने श्रमिकलाई आत्मदाहजस्तो निर्मम बाटो रोज्न बाध्य बनाउने सरकारका संरचनाहरू जल्लादको भूमिकामा रहेको उनको आरोप छ।

संगठनले गणेश नेपालीको आत्मदाह घटनाको निष्पक्ष छानबिन गरी दोषीमाथि कानुनी कारबाही गर्न, उनका आश्रित परिवारलाई क्षतिपूर्ति उपलब्ध गराउन तथा ट्राफिक जरिवाना र दण्डको नाममा गरिने दमनकारी अभ्यास तत्काल रोक्न माग गरेको छ। साथै, सरकारले जारी गर्न लागेको जरिवाना वृद्धि सहितको सवारी तथा यातायात ऐन, २०८३ का श्रमिकविरोधी दफाहरू परिमार्जन गर्नुपर्ने पनि संगठनको माग छ।

त्यस्तै, सडकमा वर्षौंदेखि भइरहेको राज्य आतंक अन्त्य नगर्ने हो भने गणेश नेपालीको आत्मदाहजस्ता घटनामा वृद्धि भई थप श्रमिक आत्मदाह गर्नुपर्ने अवस्था सिर्जना हुन सक्ने चेतावनी संगठनले दिएको छ। सार्वजनिक यातायात सुधारका लागि भौतिक पूर्वाधारको विकास र श्रमिकमैत्री नीति निर्माण गर्न पनि संगठनले माग गरेको छ।

यातायात श्रमिकमाथि सडकमा हुने दुर्व्यवहार र अपमानको अन्त्य, सुरक्षित पूर्वाधार, स्वच्छ कार्यस्थल तथा सामाजिक सुरक्षा सहितको सुरक्षित जीवनको ग्यारेन्टी सुनिश्चित गर्नुपर्ने भन्दै संगठनले चारबुँदे ध्यानाकर्षण गराएको छ।

बिहीबार मध्यान्ह त्रिपुरेश्वरस्थित राहदानी विभागअगाडि मुगुका २५ वर्षीय गणेश नेपालीले चलाइरहेको मोटरसाइकलमा नगर प्रहरीले ह्वीललक लगाई जरिवाना काटेपछि उनले आफ्नो गल्ती नभएको जिकिर गरेका थिए। घण्टौँसम्म मोटरसाइकल नछाडिएपछि उनले आफ्नै मोटरसाइकलबाट पेट्रोल निकालेर शरीरमा खन्याई आगो लगाएको बताइएको छ । उपचारका क्रममा शुक्रबार उनको निधन भएको थियो।

- एआई निर्मित तस्बिर : च्याटजिपिटी