धार्मिक तथा पर्यटकीय गन्तव्य प्रवर्द्धन गर्न साउन २ मा 'कोरा राइड–२०२६'

धरान, ३१ असार — धार्मिक तथा पर्यटकीय क्षेत्रको प्रवर्द्धन गर्ने उद्देश्यले धरानमा एक दशकदेखि निरन्तर आयोजना हुँदै आएको कोरा राइड–२०२६ (साइकल जात्रा) आगामी साउन २ गते (शनिबार) हुने भएको छ।

पेड्लर्स धरान माउन्टेन बाइकिङ क्लबले बुधबार पत्रकार सम्मेलन गर्दै यस वर्षको च्यारिटी राइड ३० किलोमिटर दूरीको हुने जनाएको हो। क्लबका अध्यक्ष किसन मास्केका अनुसार सन् २०२४ देखि पेड्लर्स धरानले कोरा राइडको आयोजना गर्दै आएको छ भने यस वर्ष ३०० भन्दा बढी राइडर सहभागी गराउने लक्ष्य राखिएको छ।

नेपालमा सन् २०११ मा काठमाडौंबाट सुरु भएको कोरा राइड च्यारिटी साइकल अभियान हाल देशका विभिन्न शहरमा सञ्चालन हुँदै आएको छ। धार्मिक तथा पर्यटकीय स्थललाई 'चेक पोइन्ट' बनाएर साइकल यात्रा सम्पन्न गरिने यस अभियानमा प्रत्येक वर्ष हजारौं साइकलप्रेमी सहभागी हुँदै आएका छन्।

आयोजकका अनुसार यस वर्षको कार्यक्रममार्फत कोशी प्रदेश सरकारले अघि सारेको 'कोशी प्रदेश पर्यटन वर्ष २०८३' अभियानलाई समेत टेवा पुर्‍याउने लक्ष्य राखिएको छ। साइकल यात्रामार्फत प्रदेशका प्राकृतिक, सांस्कृतिक तथा पर्यटकीय सम्पदाको प्रचारप्रसार गर्दै दिगो र वातावरणमैत्री पर्यटन विकासमा योगदान पुर्‍याउने उद्देश्य रहेको जनाइएको छ।

कोशी प्रदेश सरकारका पर्यटन, वन तथा वातावरण मन्त्री भीम पराजुलीको प्रमुख आतिथ्यमा हुने कार्यक्रम धरान–२ स्थित भानुचोकबाट बिहान ६ बजे सुरु हुनेछ। साइकल र्‍याली धरान–५ स्थित लाङ्घाली सामुदायिक वनमा पुगेर समापन हुने आयोजकले जनाएको छ।

कार्यक्रममा सहभागी सबै राइडरलाई टी–सर्ट, मेडल, साइकल बफ उपलब्ध गराइनेछ। साथै विभिन्न स्थानमा खाना, खाजा, जुस, मोही र लस्सीको व्यवस्था गरिएको छ। सुनसरी बाहिरबाट आउने सहभागीका लागि एक रातको आवास र रात्रीभोजनको समेत व्यवस्था गरिएको आयोजकले जनाएको छ।

गत वर्षझैं यस वर्ष पनि सहभागीका लागि गोलाप्रथामार्फत विभिन्न पुरस्कार तथा उपहार वितरण गरिनेछ। मुख्य आकर्षणका रूपमा एमटिबी गियर्सको सहयोगमा माउन्टेन बाइक पुरस्कार राखिएको अध्यक्ष मास्केले जानकारी दिए। कोरा राइड साउन २ गते शनिबार बिहान ६ बजे धरान-२ स्थित भानुचोकबाट सुरु हुनेछ ।