सुनसरीमा राजमार्ग क्षेत्रको कर्फ्यू हटाइयो, संवेदनशील क्षेत्रमा यथावत्, हरिनगर र देवानगञ्जमा निषेधाज्ञा

इनरुवा । जिल्ला प्रशासन कार्यालय सुनसरीले हरिनगर गाउँपालिका र देवानगञ्ज गाउँपालिकामा जारी गरिएको निषेधाज्ञा कायम राख्दै पाँच संवेदनशील बजार क्षेत्रमा भने अनिश्चितकालीन कर्फ्यू आदेश यथावत् रहने जनाएको छ।

मंगलबार जारी विज्ञप्तिमा देवानगञ्ज गाउँपालिका–३ स्थित कप्तानगञ्जमा भएको घटनापछि उत्पन्न परिस्थितिलाई मध्यनजर गर्दै सम्भावित जोखिम न्यूनीकरणका लागि यसअघि जिल्लाका विभिन्न स्थानमा कर्फ्यू र निषेध आदेश जारी गरिएको उल्लेख छ। परिस्थितिको मूल्याङ्कनका क्रममा केही स्थानको कर्फ्यू हटाइएको भए पनि सुरक्षा संवेदनशीलतालाई ध्यानमा राख्दै हरिनगर र देवानगञ्ज गाउँपालिकाभर निषेधाज्ञा कायम राखिएको प्रशासनले जनाएको छ।

प्रशासनका अनुसार साउन १३ गते बिहान ७ बजेदेखि साँझ ७ बजेसम्म हरिनगर गाउँपालिका र देवानगञ्ज गाउँपालिकाको सम्पूर्ण क्षेत्रमा निषेधाज्ञा लागू रहनेछ।

यस्तै, हरिनगरको घुस्की र भुटाहा बजार क्षेत्र तथा देवानगञ्जको कप्ताननगञ्ज, घुस्की र देवानगञ्ज बजार क्षेत्रमा भने अनिश्चितकालीन कर्फ्यू आदेश यथावत् रहने जनाइएको छ।
जिल्ला प्रशासन कार्यालयले सर्वसाधारणलाई निषेधाज्ञा तथा कर्फ्यू आदेशको पूर्ण पालना गर्न आग्रह गर्दै शान्ति–सुरक्षा कायम राख्न प्रशासनलाई सहयोग गर्न अपिल गरेको छ। विज्ञप्तिमा आदेश उल्लङ्घन गर्ने व्यक्तिमाथि प्रचलित कानुनबमोजिम कारबाही हुने चेतावनी पनि दिइएको छ।