धरान देशीलाइनका आन्दोलित व्यवसायीमाथि प्रहरीले गर्‍यो हातपात, नगरपालिकाद्वारा वार्ताको आह्वान

धरान । भानुचोकको बसपार्क सारिएपछि एकतर्फी (वन-वे) सवारी आवागमनलो औचित्य सकिएको भन्दै दुईतर्फी आवगमन सुरु गर्न आन्दोलनरत व्यवसायीमाथि प्रहरीले हातपात गरेको छ । 

दोस्रो दिन बिहीबार आन्दोलित व्यवसायीलाई प्रहरीले देशीलाइनबाट धरपकड गरी पक्राउ गरेको छ भने केही व्यवसायीमाथि प्रहरीले हातपात गरेको दृश्य सार्वजनिक भएको छ । 

देशिलाइनका आन्दोलनरत व्यवसायी भुपाल चाम्लिङ राई, सोहेब अन्सारी, कृष्ण वर्णवाललगायतलाई प्रहरीले धरपकड गरी इलाका प्रहरी कार्यालय पुर्‍याएको छ । व्यवसायी इलाका प्रहरी कार्यालयमा पुगेका छन् । 

व्यवसायीलाई धरपकड गर्दै पक्राउ गरिएपछि  धरान उपमहानगरपालिकाले देशीलाइनका स्थानीयलाई छलफल गर्न आह्वान गरेको छ । 

धरान उपमहानगरपालिकाले वडा नम्बर २ को देशीलाइन क्षेत्रका स्थानीय बासिन्दा, व्यवसायी तथा सरोकारवालासँग देखिएका माग, गुनासा र चासोका विषयमा छलफल गर्न आह्वान गरेको हो ।

कार्यवाहक प्रमुख अइन्द्र विक्रम बेघाले जारी गरेको पत्रअनुसार पछिल्ला दुई दिनदेखि उठिरहेका विषयप्रति उपमहानगरपालिकाको गम्भीर ध्यानाकर्षण भएको उल्लेख छ । स्थानीय सरकार सञ्चालन ऐन, प्रचलित कानुन र संविधानले प्रत्याभूत गरेका नागरिक अधिकारको सम्मान गर्दै समस्या संवाद, छलफल, सहकार्य र आपसी समझदारीका आधारमा समाधान गर्ने प्रतिबद्धता उपमहानगरपालिकाले व्यक्त गरेको छ ।

यसै उद्देश्यले सम्बन्धित पक्षसँग छलफल गर्न सुनसरी उद्योग वाणिज्य सङ्घको उपस्थितिमा बैठक बोलाइएको हो । बैठकमा देशीलाइन क्षेत्रका स्थानीय, व्यवसायी तथा सरोकारवालालाई आफ्ना धारणा, सुझाव, माग र विचार राख्न आग्रह गरिएको छ ।
छलफल साउन १५ गते शुक्रबार बिहान ७ बजे धरान उपमहानगरपालिकाको नगर कार्यपालिकाको कार्यालयस्थित सभाहलमा हुने जनाइएको छ ।

उपमहानगरपालिकाले सबै सम्बन्धित पक्षलाई तोकिएको समय र स्थानमा उपस्थित भई समस्या समाधानका लागि रचनात्मक सहभागिता जनाउन अनुरोध गरेको छ ।