हिन्दू राष्ट्रको विषयमा सर्वदलीय छलफल अघि बढाउने सहमति, संयुक्त हिन्दू मोर्चाद्वारा आन्दोलन स्थगित

जनकपुरधाम । संयुक्त हिन्दू मोर्चाले आफ्नो आन्दोलनका सबै कार्यक्रम तत्कालका लागि स्थगित गरेको छ। गृहमन्त्री सुधन गुरुङको उपस्थितिमा जिल्ला प्रशासन कार्यालय धनुषामा सरकारसमक्ष १३ बुँदे मागपत्र बुझाएपछि आन्दोलनका कार्यक्रम स्थगित गरिएको हो।

मोर्चाले शान्ति, सामाजिक सद्भाव, धार्मिक सहिष्णुता तथा धार्मिक सहअस्तित्वलाई कायम राख्दै नेपाललाई हिन्दू राष्ट्र बनाउने विषयमा स्पष्ट समयसीमा (तीन महिना) तोकी सर्वदलीय बैठकमार्फत छलफल प्रक्रिया अघि बढाउन सरकारसँग माग गरेको छ। सोही विषयमा सरकार सकारात्मक रूपमा छलफल अघि बढाउन सहमत भएपछि आन्दोलनका कार्यक्रम स्थगित गरिएको जनाइएको छ।

मोर्चाले कुनै पनि धर्म, सम्प्रदाय वा समुदायले धार्मिक अवसरमा हातहतियार प्रदर्शन गर्ने गतिविधि नियन्त्रण गरी संलग्न व्यक्ति वा समूहलाई कानुनी कारबाही गर्न माग गरेको छ। मठ, मन्दिर, मस्जिद, मदरसा, गुम्बा र चर्चलगायत धार्मिक स्थलमा जडान गरिएका लाउडस्पिकर तथा ध्वनि विस्तारक उपकरणको प्रयोग नियमन गर्न तथा आवश्यक धार्मिक गतिविधिमा परिसरभित्र मात्रै सीमित गर्नुपर्ने माग पनि राखिएको छ।

यस्तै, सबै धार्मिक स्थलमा बसोबास गर्ने व्यक्तिको अभिलेखीकरण, पहिचान खुलाउने व्यवस्था तथा विदेशी नागरिक भए सम्बन्धित निकायमार्फत निगरानी र व्यवस्थापन गर्नुपर्ने माग गरिएको छ। सामाजिक सञ्जाल वा अन्य माध्यमबाट धार्मिक, साम्प्रदायिक तथा जातीय द्वेष फैलाउने, चरित्रहत्या गर्ने वा अतिवादी सोच फैलाउने व्यक्तिमाथि प्रचलित कानुनअनुसार कारबाही गर्न पनि मोर्चाले सरकारसँग आग्रह गरेको छ।

मागपत्रमा सुनसरीको देवानगञ्ज घटनापछि आन्दोलनका क्रममा पक्राउ परेका व्यक्तिमाथि दर्ता भएका मुद्दाको पुनरावलोकन गरी आवश्यक निर्णय लिन र कानुनी प्रक्रियाअनुसार रिहा गर्नुपर्ने, घाइतेहरूको उपचार तथा आवश्यक स्वास्थ्य सेवाको व्यवस्था गर्नुपर्ने उल्लेख छ। साथै धार्मिक आयोगहरूको औचित्य, आवश्यकता र कानुनी आधारको पुनरावलोकन गरी आवश्यक प्रक्रिया अघि बढाउन पनि माग गरिएको छ।

मोर्चाले आन्दोलनमा सहभागी नागरिकको सुरक्षा तथा शान्ति–सुरक्षाको प्रत्याभूति सरकारले गर्नुपर्ने, २०६२/०६३ सालदेखि हालसम्म प्रदान गरिएका नेपाली नागरिकताको छानबिन गरी विदेशी नागरिकका विषयमा आवश्यक कानुनी प्रक्रिया अघि बढाउनुपर्ने तथा मदरसा, मस्जिद र अन्य धार्मिक संस्थाका विभिन्न गतिविधिको अनुगमन तथा नियमन गरी आवश्यक कारबाही गर्नुपर्ने मागसमेत गरेको छ।

त्यसैगरी १२ वर्षीया आनन्द दासको घटनामा संलग्न व्यक्तिको पहिचान गरी कानुनी कारबाही गर्न र पीडितलाई क्षतिपूर्ति उपलब्ध गराउन माग गरिएको छ।

गृहमन्त्री सुधन गुरुङको उपस्थितिमा जिल्ला प्रशासन कार्यालय धनुषामा सरकारसमक्ष मागपत्र बुझाएपछि संयुक्त हिन्दू मोर्चाले आन्दोलनका सम्पूर्ण कार्यक्रम तत्कालका लागि स्थगित गर्ने निर्णय गरेको जनाएको छ।