फोनिज स्थापना दिवसमा पत्रकार लिम्बू सम्मानित, २५० जनाको आँखा परीक्षण

विराटनगर । नेपाल आदिवासी जनजाति पत्रकार महासंघ (फोनिज) को २७औँ स्थापना दिवसका अवसरमा पत्रकार भक्तशेर लिम्बू सम्मानित भएका छन् । स्थापना दिवसकै अवसरमा आयोजित शिविरमा २५० जनाको आँखाको नि:शुल्क परीक्षण गरिएको छ ।

फोनिज प्रदेश लेखा समिति संयोजक प्रेम देवानका स्वर्गीय पिता कृष्ण देवानको स्मृतिमा स्थापित ‘कृष्ण देवान स्मृति पुरस्कार’ लिम्बूलाई प्रदान गरिएको हो । उज्यालो प्रदेश डटकमका सम्पादक तथा फोनिजका प्रदेश संस्थापक इन्चार्ज एवं मोरङका पूर्वअध्यक्ष लिम्बूलाई नगद ८ हजार रुपैयाँ, कदरपत्र र दोसल्लासहित सम्मान गरिएको थियो ।

पथरीशनिश्चरेका नगरप्रमुख मोहनप्रसाद तुम्बापो र पुरस्कारका संरक्षक प्रेम देवानले लिम्बूलाई पुरस्कार प्रदान गरे । गत वर्षदेखि प्रदान गर्न थालिएको पुरस्कार पहिलोपटक फोनिजका संघीय उपाध्यक्ष अर्जुन जम्नेली राईलाई प्रदान गरिएको थियो ।

नगरप्रमुख तुम्बापोले पत्रकारिता सूचना प्रवाहमा मात्र सीमित नरही सामाजिक सेवामा समेत सक्रिय हुनुपर्ने बताए । फोनिज मोरङका अध्यक्ष अनिल श्रेष्ठले स्थापना दिवसलाई औपचारिक कार्यक्रमभन्दा समुदायसँग जोड्ने उद्देश्यले सामाजिक सेवाको कार्यक्रम गरिएको बताए ।

आँखा शिविरमा परीक्षण गरिएका २५० जनामध्ये २५ जनामा मोतियाबिन्दु देखिएको आयोजकले जनाएको छ । पहिचान भएका बिरामीको विराटनगरस्थित विराट रानी आँखा अस्पतालमा थप उपचार गरिनेछ । शिविरमा आवश्यक औषधिसमेत निःशुल्क वितरण गरिएको थियो । विराट रानी आँखा अस्पतालको प्राविधिक सहयोग र शिवम मेडिकोको समन्वयमा शिविर सञ्चालन गरिएको हो ।

कार्यक्रममा शिविर सञ्चालनमा सहयोग गर्ने शिवम मेडिकोका सञ्चालक देशबन्धु ढकाल र विराट रानी आँखा अस्पताललाई सम्मान गरिएको थियो । कार्यक्रममा फोनिज प्रदेश उपाध्यक्ष अर्जुन राई, नेपाल पत्रकार महासंघ मोरङका सहसचिव रेवती निरौला, सिंहबहिनी माध्यमिक विद्यालयका प्रधानाध्यापक उमेश खड्कालगायतको उपस्थिति थियो।

शनिबार मोरङको पथरीशनिश्चरे–९, रिगुवास्थित सिंहबहिनी माध्यमिक विद्यालयमा कार्यक्रममा आयोजना गरिएको थियो ।