धरानका ३१ विद्यालयबीच बृहत् पाककला प्रतियोगिता, माउन्ट हर्मोन प्रथम

धरान । स्थानीय स्काउट कार्यालय धरानको आयोजनामा भएको बृहत् पाककला प्रतियोगितामा माउन्ट हर्मोन विद्यालयको स्काउट ट्रुप प्रथम भएको छ ।

शिक्षा सदन माध्यमिक विद्यालय धरान–१५ को व्यवस्थापनमा शनिबार सम्पन्न प्रतियोगितामा धरानका ३१ सामुदायिक तथा संस्थागत विद्यालयका स्काउट विद्यार्थी सहभागी भएका थिए । प्रतियोगितामा सहभागी विद्यार्थीले शिक्षा सदन माविको प्राङ्गणमा परम्परागत रूपमा दाउराको आगोमा खाना पकाएका थिए ।

स्थानीय स्काउट कार्यालय धरानको वार्षिक कार्यतालिकाअनुसार आयोजित प्रतियोगितामा करिब ३५० स्काउट विद्यार्थीको सहभागिता रहेको थियो । विद्यार्थीलाई व्यावहारिक ज्ञान र सीप प्रदान गर्दै उनीहरूको सर्वाङ्गीण विकास गर्ने उद्देश्यले कार्यक्रम आयोजना गरिएको आयोजकले जनाएको छ ।

प्रतियोगितामा आशा एकेडेमीको स्काउट ट्रुप द्वितीय, शिक्षा सदन माविको स्काउट ट्रुप तृतीय तथा किरातेश्वर माविको स्काउट ट्रुप सान्त्वना भएको छ ।

प्रतियोगिताको सभाध्यक्ष शिक्षा सदन माविका प्रधानाध्यापक अशोक पोखरेल र प्रमुख अतिथि धरान उपमहानगरपालिकाका कार्यवाहक नगरप्रमुख तथा स्थानीय स्काउटका संरक्षक अइन्द्रविक्रम बेघा थिए ।

कार्यक्रममा नेपाल स्काउट कोशी प्रदेशका प्रमुख आयुक्त हेमन्त भण्डारी, राष्ट्रिय परिषद् सदस्य निर्मला अधिकारी, पूर्व राष्ट्रिय सचिव वासुदेव भण्डारी, शिक्षा महाशाखा प्रमुख तथा स्थानीय स्काउटका सदस्यसचिव ध्रुवराज खड्का, किरातेश्वर माविका प्रधानाध्यापक योगेन्द्र पालुङ्वालगायतको उपस्थिति थियो ।

प्रतियोगिताका निर्णायकमा कोशी प्रदेश शैक्षिक पद्धति आयुक्त सुशील राई, सदस्य वृद्धि आयुक्त सन्तोष घिमिरे र स्थानीय परिषद् सदस्य सूर्यकुमार सुनुवार थिए । कार्यक्रम सञ्चालन शिक्षा सदन माविकी स्काउटर आरती श्रेष्ठले गरेकी थिइन् भने स्थानीय प्रमुख आयुक्त मधुसूदन घिमिरेले स्वागत मन्तव्य दिएका थिए ।

धरान उपमहानगरपालिकाले माध्यमिक तहसम्म अध्ययन हुने सबै विद्यालयमा स्काउट कार्यक्रम सञ्चालन गर्ने निर्णय गरेअनुसार स्थानीय स्काउट कार्यालयले त्यसको व्यवस्थापन गरिरहेको जनाएको छ । कार्यालयले विद्यार्थीको व्यावहारिक तथा जीवनोपयोगी सीप विकासका लागि यस्ता सिकाइमूलक कार्यक्रमलाई निरन्तरता दिँदै आएको जनाएको छ ।