विराटनगरमा ५९औँ राधाकृष्ण रथयात्रा सुरु, ५ लाख भक्तजन सहभागी हुने

विराटनगर । विराटनगरको ऐतिहासिक ५९औँ राधाकृष्ण रथयात्रा शनिबार अपराह्न ३ः३० बजे सुरु भएको छ । विराटनगर–१ स्थित तीनपैनी चोकको राधाकृष्ण मन्दिर परिसरमा विशेष पूजाआजापछि रथ नगर परिक्रमा गर्न निस्किएको हो ।

दक्षिण एसियाकै दोस्रो ठूलो मानिने रथयात्रामा नेपालका विभिन्न जिल्ला तथा छिमेकी भारतबाट गरी यस वर्ष ५ लाखभन्दा बढी भक्तजन सहभागी हुने अनुमान गरिएको छ । ठूलो संख्यामा भक्तजन सहभागी हुने भएकाले रथयात्रालाई व्यवस्थित बनाउन आयोजक समिति, स्वयंसेवक तथा सुरक्षा निकायले विशेष तयारी गरेका छन् ।

यस वर्ष रथयात्राका क्रममा संकलन हुने सम्पूर्ण भेटी भोटेकोशी बाढीपीडितको राहतका लागि प्रदान गरिने भएको छ । राधाकृष्ण मन्दिर व्यवस्थापन समितिका अनुसार नगर परिक्रमाका क्रममा रथसँगै लगिने तीनवटा दानपेटिकामा संकलित रकम प्रधानमन्त्री दैवी प्रकोप राहत कोषमार्फत बाढीपीडितलाई उपलब्ध गराइनेछ ।

पछिल्ला वर्षहरूमा धार्मिक पर्वमा चर्को आवाजमा बज्ने डिजे साउन्डका कारण धार्मिक तथा आध्यात्मिक वातावरण प्रभावित भएको भन्दै यसपटक रथयात्रामा डिजे पूर्ण रूपमा प्रतिबन्ध गरिएको छ ।

‘धार्मिक पर्वको मौलिकता र आध्यात्मिक वातावरण कायम राख्न हामीले डिजेको सट्टा भजन–कीर्तन र परम्परागत झाँकीलाई प्राथमिकता दिएका छौँ,’ समितिका अध्यक्ष कैलाश रेग्मीले भने ।

रथमा जडान गरिएका दुईवटा हर्न माइकबाट भगवानका भजन बजाइनेछ । रथयात्राको विभिन्न स्थानमा स्थानीय भजन मण्डलीले समेत प्रस्तुति दिइरहेका छन् ।

९५ वर्षको इतिहास

विराटनगरमा रथयात्राको इतिहास वि.सं. १९८८ देखि सुरु भएको हो । मन्दिर स्थापना भएपछि सुरुमा ‘खट यात्रा’ गरिन्थ्यो । वि.सं. २०२५ देखि भने यसलाई भव्य रथयात्राका रूपमा मनाउन थालिएको हो ।

खट यात्राको इतिहासलाई आधार मान्दा यो ९५औँ वर्ष हो भने रथयात्राका रूपमा यस वर्ष ५९औँ संस्करण मनाइँदैछ ।
राधाकृष्ण मन्दिर परिसरबाट सुरु भएको रथयात्रा तीनपैनी चोक, गोल्छा चोक, मेनरोड, ट्राफिक चोक, रोडशेष चोक र महेन्द्र चोक हुँदै कोशी राजमार्गतर्फ अघि बढ्नेछ । त्यसपछि बरगाछी हुँदै दुर्गा चोक पुगेर पुनः राधाकृष्ण मन्दिरमा आएपछि रथयात्रा विसर्जन हुनेछ ।

करिब ८ किलोमिटर दूरीको रथयात्राका क्रममा ४४ स्थानमा रथ विश्रामको व्यवस्था गरिएको छ ।

सुरक्षामा १ हजार ५ सयभन्दा बढी प्रहरी

रथयात्राको सुरक्षालाई उच्च प्राथमिकतामा राख्दै १ हजार ५ सयभन्दा बढी प्रहरी परिचालन गरिएको मोरङ प्रहरी प्रमुख एसपी कवित कटवालले बताए ।

भिडभाडको निगरानी तथा सुरक्षा व्यवस्थालाई प्रभावकारी बनाउन ड्रोन क्यामरासमेत प्रयोग गरिएको छ । उच्छृङ्खल गतिविधि गर्ने तथा आपराधिक गतिविधिमा संलग्न हुन सक्ने व्यक्तिमाथि निगरानी बढाउन सादा पोसाकमा समेत प्रहरी परिचालन गरिएको प्रहरीले जनाएको छ ।

रथयात्रालाई व्यवस्थित बनाउन १ हजार १ सदस्यीय मूल समारोह समिति र २१ वटा उपसमिति परिचालन गरिएको छ । श्रद्धालुको सुविधाका लागि स्वास्थ्य, खानेपानी तथा सरसफाइका टोलीसमेत परिचालन गरिएको आयोजकले जनाएको छ ।