हुङ्गा खोला थुनिएपछि सप्तकोशी तटीय क्षेत्रमा सतर्कता अपनाउन प्रहरीको माइकिङ

वराहक्षेत्र । सोलुखुम्बुको महाकुलुङ गाउँपालिकामा पहिरोले हुङ्गा खोला थुनिएको छ । यसले दूधकोसी हुँदै सप्तकोशी नदीको तटीय क्षेत्रमा बाढीको जोखिम बढ्न सक्ने भन्दै प्रहरीले सतर्क रहन आग्रह गरेको छ ।

शुक्रबार बिहान महाकुलुङ गाउँपालिका–२ र ४ को सीमाक्षेत्रमा पहिरो खसेको हो । पहिरोले हुङ्गा खोला थुनिएको छ । खोलामा करिब १०० मिटर लामो र १५ मिटर अग्लो प्राकृतिक बाँध बनेको प्रहरीले जनाएको छ ।

प्रहरीका अनुसार गौरीशंकर हाइड्रोपावरको हेडअफिसबाट करिब १०० मिटर तल पहिरो खसेको हो । वडा नं. २ तर्फ करिब ३५ मिटर अग्लो पहिरो खसेपछि खोलाको पानी थुनिएको प्रहरीले जनाएको छ ।

प्राकृतिक बाँधमा पानी भरिएपछि निकास हुन थालेको छ । तर जोखिम पूर्णरूपमा टरेको छैन । थप पहिरो खस्न सक्ने सम्भावना छ । पानीको बहाव एक्कासि बढ्न सक्ने जोखिम पनि रहेको प्रहरीले जनाएको छ ।

सम्भावित जोखिमलाई ध्यानमा राख्दै इलाका प्रहरी कार्यालय चतराले माइकिङ गरिरहेको छ । प्रहरीले हुङ्गा खोला, दूधकोशी र सप्तकोशी नदीको तटीय क्षेत्रमा सतर्क रहन आग्रह गरेको छ ।

हुङ्गा खोलाको पानी महाकुलुङ–२ को बोदेल हुँदै बग्छ । यो पानी सोताङ, थुलुङ दूधकोशी र नेचासल्यान गाउँपालिका क्षेत्र हुँदै दूधकोशी नदीमा मिसिन्छ । दूधकोशी हुँदै पानी सप्तकोशी नदी प्रणालीमा पुग्छ ।

त्यसैले तल्लो तटीय क्षेत्रका बस्तीलाई पनि सावधानी अपनाउन भनिएको छ । नदी किनारमा बसोबास गर्ने स्थानीयलाई सतर्क रहन प्रहरीले आग्रह गरेको छ । नदीमा आवतजावत गर्ने र काम गर्ने व्यक्तिलाई पनि सावधानी अपनाउन भनिएको छ ।
घटनास्थलमा प्रहरी टोली परिचालन गरिएको छ । प्रहरीले अवस्थाको निरन्तर निगरानी गरिरहेको जनाएको छ ।

पहिरोका कारण तत्काल जोखिम हुन सक्ने भन्दै जलविद्युत् आयोजनामा कार्यरत कामदारलाई पनि सुरक्षित स्थानमा जान सूचित गरिएको छ । गौरीशंकर हाइड्रोपावरको पावर हाउस तथा दूधकोसी–२ हाइड्रोपावर नेपालका कामदारलाई सुरक्षित स्थानमा जान भनिएको छ । सहास ऊर्जा लिमिटेडका दुईवटा जलविद्युत् आयोजनामा कार्यरत कामदार र सवारीसाधनलाई पनि सुरक्षित स्थानमा जान सूचित गरिएको प्रहरीले जनाएको छ । सप्तकोशी नदीको माथिल्लो तटीय क्षेत्रमा निरन्तर वर्षासमेत भइरहेको छ ।