धरान मेघा हिमालयन कलेजद्वारा नवआगन्तुक विद्यार्थीलाई स्वागत

धरान । धरान-१२ स्थित धरान मेघा हिमालयन कलेजले नवआगन्तुक विद्यार्थीलाई स्वागत सम्मान गरेको छ । कक्षा-१२ का विद्यार्थीले गायन, नृत्य, साङ्गीतिक कार्यक्रममार्फत कक्षा-११ का नवआगन्तुक विद्यार्थीलाई स्वागत गरेका हुन् । 

प्रमुख अतिथि धरान उपमहानगरपालिकाका शिक्षा महाशाखा प्रमुख ध्रुवराज खड्काले पानसमा दीप प्रज्ज्वलन गरी औपचारिक कार्यक्रमको उद्घाटन गरेका थिए । विद्यार्थीले कलेजमा ज्ञानसँगै अतिरिक्त कृयाकलाप र जीवनोपयोगी सीप सिक्नुपर्ने आवश्यकता रहेको औंल्याए । 

धरान-१५ स्थित चुम्लुङ हिममा शुक्रबार आयोजित स्वागत कार्यक्रममा विद्यार्थीले गायन तथा नृत्यका २२ वटा प्रस्तुति दिएका थिए । सो अवसरमा उत्कृष्ट शिक्षकका रुपमा प्रमोद श्रेष्ठलाई सम्मान गरिएको थियो । 

कलेजका अध्यक्ष राजेश विद्रोहीले कलेजमा लामो समयदेखि शैक्षिक क्षेत्रमा अध्यापन गराएका अनुभवी शिक्षकले अध्यापन गराउँदै आएको बताए । धरान मेघा हिमालयन कलेजको शैक्षिक गुणस्तर वृद्धि भइरहेकाले विद्यार्थी र अभिभावकको आकर्षण बढेको अध्यक्ष विद्रोहीले बताए । सो अवसरमा उनले विद्यार्थीहरूले अनुशासित भएर ज्ञान, सीप आर्जन गर्ने अपेक्षा लिएको बताए । 

विद्यार्थीले मनोरञ्जनात्मक कार्यक्रमसँगै हाजिरीजवाफ प्रतियोगितालगायतका कार्यक्रम आयोजना गरे । स्वागत कार्यक्रममा विद्यार्थीका तर्फबाट स्वर्णिम थापा मगरले स्वागत मन्तव्य दिएका थिए भने आगन्तुक तथा अभिभावकलाई प्रधानाध्यापक दीपक घिमिरेले स्वागत गरेका थिए । 

धरान मेघा हिमालयन कलेजले कक्षा-११ मा ५७० जना विद्यार्थी भर्ना गरेको छ । कलेजमा विज्ञान, कम्प्युटर विज्ञान, होटल म्यानेजमेन्ट, कम्प्युटर म्यानेजमेन्ट र म्यानेजमेन्ट विषय अध्यापन गराइरहेको कलेजका एकेडेमिक डाइरेक्टर अर्जुन घिमिरेले जानकारी दिए ।