पाकिस्तानका लागि जासुसी गरेको आरोपमा भारतीय चर्चित भ्लगर ज्योति मल्होत्रा पक्राउ

भारतीय चर्चित ट्राभल भ्लगर ज्योति मल्होत्रा पक्राउ परेकी छन् । भारतीय प्रहरीले पाकिस्तानका लागि जासुसी गरेको आरोपमा ‘ट्राभल विथ जो’ नामक युट्युब च्यानल चलाउँदै आएकी ३३ वर्षीया मल्होत्रालाई पक्राउ गरेको हो ।

उनले व्हाट्सएप, टेलिग्राम र स्न्यापच्याटमार्फत पाकिस्तानी उच्चायोगका कर्मचारी एहसान उर रहिम उर्फ दानिशसँग गोप्य सम्पर्क राखेको प्रहरीको प्रारम्भिक अनुसन्धानमा देखिएको छ । दानिश १३ मेमा जासुसीको आरोपमा भारतबाट निष्कासित भएका थिए ।

मल्होत्राको युट्युब च्यानलमा ‘इन्डियन गर्ल इन पाकिस्तान’, ‘इन्डियन गर्ल एक्सप्लोरिंग लाहोर ? ‘इन्डियन गर्ल एट कटास राज टेम्पल’ जस्ता भिडियोहरू अपलोड भएका छन्, जसलाई प्रहरीले उनको जासुसी गतिविधिको आवरण मानेको छ ।

अनुसन्धानका क्रममा मल्होत्रा हरियाणा र पञ्जाबमा फैलिएको ठूलो जासुसी सञ्जालको हिस्सा भएको पाइएको छ । उनले पाकिस्तानी गुप्तचरसँग घनिष्ठ सम्बन्ध राखेको, जसमा एक जनासँग इन्डोनेसियाको बाली भ्रमण गरेको भारतीय सञ्चारमाध्यमले उल्लेख गरेका छन् ।

भारत र पाकिस्तानबिच बढ्दो तनावको समयमा यो कारबाही गरिएको हो । २२ अप्रिलमा कश्मीरको पहलगाममा भएको आतंकवादी हमलामा एक नेपालीसहित २६ पर्यटकको मृत्यु भएको थियो । त्यसपछि भारतले पाकिस्तान र पाकिस्तान–नियन्त्रित कश्मीरमा आतंकवादी संरचनामाथि हमला गरेको थियो ।

जवाफमा पाकिस्तानले पनि भारतमाथि हमला गरेको थियो। तर अमेरिकी दबाबमा आएर दुवै देशले युद्धविराम गरेका छन् ।सोही आरोपमा मल्होत्रासहित हरियाणा र पञ्जाबका अन्य छ जना पनि पक्राउ परेको भारतीय प्रहरीले जानकारी दिएको छ ।