धरान–८ मा विकास कि जोखिम? करिडोर काम रोकिँदा स्थानीय संकटमा

धरान । धरान उपमहानगरपालिका–८ स्थित खहरे खोलामा करिडोर निर्माण गर्ने उद्देश्यले सुरु गरिएको काम अलपत्र पर्दा स्थानीयवासी चिन्तित बनेका छन्। करिडोर निर्माणको नाममा केही महिना अघि डोजर लगाएर क्षेत्र खनिएको भए पनि तीन महिना बितिसक्दा समेत निर्माण कार्य अघि बढ्न सकेको छैन।

बीचमै छाडिएको कामका कारण खोलाको किनार झनै कमजोर बनेको छ। वर्षायाम सुरु भइसकेको अवस्थामा खहरे खोलामा ठूलो बाढी आउने जोखिम रहने भएकाले यहाँ बसोबास गर्दै आएका स्थानीयवासी त्रासमा छन्। उनीहरूका अनुसार पहिले नै वर्षाको समयमा खोलामा ठूलो पानी आउने गरेकोमा अहिले जमिन खनेर छाडिएकाले जोखिम अझ बढेको छ।

स्थानीय बासिन्दाहरूले सम्बन्धित निकायप्रति गम्भीर असन्तुष्टि जनाएका छन्। “काम सुरु गरेर बीचमै छोडियो, अब वर्षामा केही भए कसले जिम्मा लिन्छ?” एक स्थानीयले प्रश्न गरे। अर्का बासिन्दाका अनुसार समयमा नै निर्माण कार्य सम्पन्न नभए यहाँ बसोबास गर्ने गरिब तथा विपन्न परिवारहरू प्रत्यक्ष प्रभावित हुनेछन् र उठिबासको अवस्था सिर्जना हुन सक्छ।
करिडोर निर्माणलाई दीर्घकालीन समाधानका रूपमा लिइए पनि काममा भएको ढिलासुस्तीले उल्टै जोखिम निम्त्याएको स्थानीयको गुनासो छ। वर्षायाम नजिकिँदै गर्दा सम्बन्धित निकायले तत्काल ध्यान नदिए ठूलो जनधनको क्षति हुन सक्ने उनीहरूको चेतावनी छ।

यस विषयमा सम्बन्धित निकायको ध्यान आकृष्ट गराउँदै स्थानीयले यथाशीघ्र निर्माण कार्य अगाडि बढाउन माग गरेका छन्।