मन्त्रिपरिषदले खोसेको थियो, धरानको पुरानो अस्पतालको जग्गा : फिर्ता ल्याउन पहल सुरु

धरान । धरान उपमहानगरपालिकाका कार्यवाहक नगर प्रमुख अइन्द्रविक्रम बेघाले धरान-१ स्थित पुरानो अस्पतालको जग्गा फिर्ता ल्याउने विषयमा नबोल्दा आयोजित भेलामा चर्काचर्की परेको छ । 

धरानमा नगर अस्पताल निर्माण गर्ने विषयमा केही दिनदेखि विवाद उत्पन्न भइरहेको छ ।  नगर अस्पताल स्थापनाको माग समेत चर्किंदै गइरहेको छ ।  आइतबार धरान उपमहानगरपालिकाको सभाहलमा आयोजित धरानवासी र सरोकारवालाको भेलामा  कावा नगरप्रमुख बेघाले १५ दिनभित्रमा नगर अस्पताल सञ्चालनमा ल्याउने विषयमा आफू प्रतिबद्ध भएको बताए  । यद्यपि उपस्थित भेलाले पुरानो अस्पतालकै जग्गा फिर्ता ल्याउन नगरपालिकाले पहल गर्नुपर्ने जोडदार माग राखेका छन् ।  
 
धरान-१६ स्थित पञ्चायत आधारभूत विद्यालय (भकारी स्कुल) लाई मर्ज गरेर उक्त स्थानमा नगर अस्पताल बनाउने विषय प्रकाशमा आएपछि विवाद  थप चुलिएको छ । पुरानो अस्पतालको जग्गा फिर्ता ल्याएर उक्त स्थानमै नगर अस्पताल निर्माण हुनु पर्ने आम धरानवासीको माग छ । २०७४ सालमा  मन्त्रिपरिषदको निर्णयले खोसिएको र बिपी प्रतिष्ठानको नाममा नामसारी भएको जग्गा धरान उपमहानगरपालिका मातहत ल्याएर नगर अस्पताल निर्माण हुनुपर्ने आम सरोकारवालाको माग छ । 

कावा प्रमुख बेघाले नगर अस्पताल निर्माण गर्ने आफ्नो प्रतिबद्धता दोहोर्‍याए पनि कुन स्थानमा अस्पताल निर्माण गर्ने विषय भने उल्लेख गरेनन् । भकारी स्कुलमा अस्पताल निर्माण गर्ने विषयमा विवाद भएपछि उनले उपमहानगरपालिकाले कुनै निर्णय नगरेको बताए । यद्यपि सञ्चार माध्यमले यो विषय प्रकाशमा ल्याएको थियो । 

धरान नगर अस्पतालको पुन:स्थापनाको माग राख्दै अभियान चलाइरहेका डा. राजेन्द्र शर्माले भेलामा पुरानो अस्पतालको इतिवृतान्त बताए । उनले मन्त्रिपरिषदबाटै जग्गा फिर्ता ल्याउनुपर्ने र त्यसको संस्थागत पहल गर्न कावा प्रमुख बेघाको ध्यानाकर्षण गराए । 

रास्वपाका नेता शरीन तामाङले नगर अस्पताल निर्माणको टुंगो नलागेसम्म नगरबाट विनियोजित २ करोड रुपैयाँ कार्यान्वयन नगर्न अनुरोध गरे । उनले विद्यालयको ठाउँमा विद्यालय नै हुनुपर्ने र अस्पतालको ठाउँमा अस्पताल नै निर्माण हुनुपर्ने माग राखे । पुरानो अस्पतालको जग्गामै नगर अस्पताल निर्माण गर्न आफ्नो पहल रहने उनको भनाइ थियो । 

अभियन्ता महेश श्रेष्ठले धरान अस्पतालको पुन:स्थापनाको जोडदार माग गरे । उपस्थित भेलाले धरान उपमहानगरपालिकाले पुरानो अस्पतालको जग्गा फिर्ता ल्याउन पहल गर्नुपर्ने माग राखेको छ । भेलामा कावा प्रमुख बेघाले बिपी प्रतिष्ठानका उपकुलपति विक्रम श्रेष्ठको भनाइ उद्धृत गर्दै प्रतिष्ठानले जग्गा फिर्ता नगर्ने भेलामा कुरा राखे । उनले १५ दिनभित्र जग्गा उपलब्ध भए सरोकारवालाको माग अनुसार नगर अस्पताल निर्माणमा लागि पर्ने बताए । बेघाले आगामी बैठक नगरपालिकाले आह्वान गर्ने र थप छलफल अगाडि बढाउने बताए ।